Uppgjör rafstallbakanna

Kristinn Ásgeir Gylfason skrifar 20. mars 2021 07:01

Síðustu tvo laugardaga hafa birst umfjallanir um rafstallabakana Tesla Model 3, vinsælasta bíl síðasta árs á Íslandi og Hyundai Ioniq. Þeir verða bornir saman í fréttinni, markmiðið er að gera upp á milli þeirra og skera úr um hvor er betri.

Samanburður

Model 3 var ekki bara vinsælasti rafbíll landsins á síðasta ári heldur vinsælasti bíll ársins, punktur. Það þarf ekki að fara mörgum orðum um að það er í fyrsta skipti sem rafbíll nær þeim árangri.

Tesla Model 3 og regnbogi.Vilhelm Gunnarsson

Minna hefur farið fyrir Hyundai Ioniq. Eins og áður hefur komið fram í umfjöllunum hér á Vísi þá er Ioniq afbragðs góður bíll. Hann er þægilegur og má segja að hann sé nákvæmlega eins og fólksbíll frá stórum virtum framleiðanda eins og Hyundai á að hafa sér, burtséð frá því hvort hann er rafbíll eður ei.

Aðstaða ökumanns í Tesla Model 3.Vilhelm Gunnarsson

Model 3 hins vegar er nýr í bekknum, Tesla hefur vissulega framleitt bíla næstum alla þessa öld, fyrirtækið var stofnað 2003. Hyundai var stofnað 1967, svona til samanburðar.

Model 3 hefur því ekki sömu arfleið að byggja á. Model 3 er öflugri, með meiri drægni og að mati blaðamanns fallegri bíll en Ioniq. Model 3 er sportbíll, það er engum blöðum um það að fletta, bíllinn er fljótur og fjöðrunin er stíf, felgurnar stórar og stýrið skarpt í viðbrögðum.

Innra rými í Hyundai Ioniq.Vilhelm Gunnarsson

Ioniq hefur talsvert fleiri einkenni hefðbundins fólksbíls. Afþreyingarkerfið þarfnast ekki mikilla útskýringa, eins og það gerir fyrst þegar sest er um borð í Model 3. Eftir fyrstu kynni virkar það afar vel í Model 3. Ioniq hentar afar vel þeim einstaklingum sem vilja hefðbundnari bíl, virkilega vandaðan og skemmtilegan. Ioniq er bíll fyrir fólk sem vill þægilegan og smekklegan bíl sem vill svo til að er rafbíll.

Model 3 er bíll fyrir fólk sem vill kraftmikinn sportbíl sem er ekki hefðbundinn og státar sig af því að vera ekki hefðbundinn. Frábær bíll, skemmtilegur að flestu leyti. Hann er sportbíll og það má ekki gleymast.

Afturendi á Hyundai Ioniq.Vilhelm Gunnarsson

Niðurstaða og verð

Niðurstaðan er ekki flókin, bílarnir falla vissulega í sama stærðarflokk og hafa því verið settir undir sama hatt í þessari umfjöllun en þeir eru ekki sambærilegir að örðu leyti.

Þeir henta ólíkum einstaklingum og eru svo ólíkir að samanburður er fullkomlega tilgangslaus að mati blaðamanns. Munurinn er þessi, annar er sportbíll og hinn er fólksbíll. Annar er þægilegur í akstri og hinn er sportbíll.