„Ég hitti Daniel Cra­ig og hann er draug­leiðin­legur“

Sitt sýnist hverjum um ágæti nýju myndarinnar og virðist fólk skiptast í tvær fylkingar um þennan dáða njósnara sem hefur verið eitt þekktasta vörumerki heimsins í tæp 60 ár.

Ragnheiður Erla Bjarnadóttir, prestur, fornleifafræðingur og leiðsögumaður, sem varð landsfræg sem spurningahöfundur og dómari í Gettu betur, er einn helsti James Bond-aðdáandi Íslands og með sterkar skoðanir um þessa sögupersónu. Hún bjó í Vín þar sem eitt kvikmyndahús sýnir aðeins Bond myndir og gekk með þann draum í maganum á sínum tíma að standa fyrir ferðalögum til útlanda á tökustaði Bond-mynda.

Ragnheiður Erla segir ýmislegt hafa breyst í fari James Bond í gegnum tíðina. Dæmi hafi verið um að Bond hafi nauðgað konum en í dag verði Bond ástfanginn og sýni meiri tilfinningar.

Þórarinn Þórarinsson menningarblaðamaður á Fréttablaðinu segir nýju myndina, sem beðið hefur verið eftir í eitt og hálft ár, virka eins og hún sé nýgerð í kjölfar Covid-faraldurins. Raunin er hins vegar sú að hún hefur setið á ís og beðið þess að fólk geti streymt í kvikmyndahús. Hún sé klók að mörgu leyti.

Undir þetta tekur Tómas Valgeirsson kvikmyndarýnir og blaðamaður hjá 24.is. Hann var ekki jafn jákvæður gangvart nýju myndinni og Þórarinn. En þó jákvæðari gagnvart Craig en Þórarinn sem hitti Daniel Craig einu sinni á ráðstefnu í Kaupmannahöfn og tók við hann viðtal.

„Ég hitti Daniel Craig og hann er draugleiðinlegur,“ segir Þórarinn og rifjaði upp fund þeirra í Stokkhólmi fyrir nokkrum árum. Ein spurning Þórarins féll í grýttan jarðveg. Sú snerist um hvort framleiðendur Bond væru farnir að apa eftir myndum um Jason Bourne.

Þá var rætt um tónlistina í Bond og margt fleira í þættinum sem sjá má upptöku af að neðan.