Stuttmynd byggð á plötu Memfismafíunnar

Þetta er stærsta verkefnið sem Helluland hefur tekið að sér hingað til og fór gríðarlegur tími og undirbúningur í þessa mynd. Þetta er fyrsta barnamynd Hellulands og er bókað að þessi stuttmynd verði algjör gleðisprengja. Myndin er byggð á plötu Memfismafíunnar, Diskóeyjunni. Eftirvæntingin hefur verið gríðarleg og hefur myndin fengið mikil lof. Hreppti myndin áhorfendaverðlaun á Kvikmyndahátíð framhaldsskólanna, þar sem hún var frumsýnd núna í mars 2021. 

Myndin fjallar um systkinin Daníel og Rut sem send eru á Diskóeyju til þess að fara í skóla. Skólinn þar er allt öðruvísi en það sem þau hafa kynnst áður. Þegar einhver vill fá að loka niður skólanum fyrir fullt og allt þurfa allir að vinna í lausnum til þess að halda skólanum opnum. Framleiðslufélagið Helluland samanstendur af skemmtilegu og metnaðarfullu ungu fólki sem hefur mikinn áhuga á kvikmyndum og öðru skemmtilegu.

Umrædd mynd var framleidd af Brynjari Leó Hreiðarssyni, Camillu Hjördísi Samúelsdóttur, Einari Karli Péturssyni, Gabríel Elí Jóhannssyni og Úlfi Arnalds og leikstýrð af Gabríel Elí Jóhannssyni.  Helluland hefur gert önnur spennandi verkefni, þar á meðal tvær verðlaunastuttmyndir Fastir í fyrsta gír og Gleðipakkinn. Báðar unnu áhorfendaverðlaun KHF en seinni hreppti einnig verðlaun bestu mynd hátíðarinnar.

Þessi grein birtist fyrst á Albumm.is. Albumm var stofnaður árið 2014 og fjallar um íslenska tónlist og menningu frá öllum hliðum. Hægt er að hafa samband í albumm@albumm.is.