Róa á nokkuð þyngri mið

Awake kom út á streymisveitum fyrr á árinu en verður fáanleg á geisladisk á útgáfutónleikunum í takmörkuðu upplagi. Awake er 12. hljóðversplata Stafræns Hákons og kemur í kjölfarið á plötunni Aftur sem kom út árið 2019.

Stafrænn Hákon hefur verið starfandi frá árinu 1999 og var í upphafi tilraunaverkefni Ólafs Josephssonar. Síðustu 10 ár hefur Stafrænn Hákon verið iðinn við kolann og þróast sem hljómsveit og hefur jafnframt getið sér orð fyrir áferðarfallegan og draumkenndan hljóðheim ýmist með eða án söngs.

Platan Awake er án söngs og þykir hljómsveitin róa á nokkuð þyngri mið á þessari plötu. Það verður boðið uppá sannkallað krafttónaflóð á útgáfutónleikunum og lofar hljómsveitin sálarlegri tónlistarupphafningu í alla staði.

Hljómsveitina skipa: Árni Þór Árnason bassaleikari; Lárus Sigurðsson gítarleikari; Magnús Freyr Gíslason söngvari og gítarleikari; Ólafur Örn Josephsson gítarleikari og Róbert Már Runólfsson trommuleikari.

Miðaverð er 4.500 kr. og hægt er að tryggja sér miða í gegnum TIX.is frá og með föstudeginum 26. ágúst.