Nýtt stuðningskerfi fyrir rafíþróttadeildir og félög

Hjörtur Leó Guðjónsson skrifar 25. október 2022 23:01

Rafíþróttasamtök Íslands, RÍSÍ, hefur gert samstarfssamning við Esports Coaching Academy um dreifingu á æfinga- og stuðningsefni sem mun aðstoða rafíþróttaþjálfara hér á landi.

Esports Coaching Academy, eða ECA, er ungt íslenskt fyrirtæki sem sérhæfir sig í framleiðslu og dreifingu á stuðningsefni fyrir rafíþróttastarf ungmenna. Fyrirtækið er nú þegar farið að vinna með félögum, fyrirtækjum og skólum í Bandaríkjunum og Púertó Ríkó.

Með samkomulagi RÍSÍ og ECA verður RÍSÍ eini viðurkenndi endursölu- og dreifingaraðili á efni ECA á Íslandi. ECA þjónustar rafíþróttafélög og þjálfara í því að veita aðgang að gagnagrunni með sérsniðnum æfingum og námskeiðum fyrir þjálfara sem undirbýr þá í að vinna með börnum ásamt því að kenna þeim á helstu leikina sem eru stundaðir.

Þannig hefur félagið útfært æfingar sem henta aldri, getustigi og hópasamsetningu sem snert á líkamlegum æfingum, æfingum í leikjunum sjálfum, ásamt æfingum utan tölvunnar sem byggja upp færni sem kemur sér vel í rafíþróttum. Þar má nefna samskipti, leiðtogafærni, snerpu, liðleika, styrk og traust.

„Æfingakerfi ECA leysir vanda sem við höfum verið að kljást við“

Ólafur Steinarsson (t.v.), fyrrum formaður RÍSÍ, og Aron Ólafsson (t.h.), framkvæmdarstjóri RÍSÍ.Aðsend

Aron Ólafsson, framkvæmdarstjóri RÍSÍ, segir að með samstarfinu sé verið að tryggja enn betur gæði æskulýðsstars á Íslandi, sem nú þegar er með því allra besta sem þekkist. Þá segir hann einnig að æfingakerfið muni leysa ýmsan vanda sem rafíþróttaþjálfarar hafa verið að kljást við.

„Með þessu samstarfi tryggjum við enn betur gæði æskulýðsstarfs á Íslandi sem er nú þegar með því allra besta sem þekkist. Æfingakerfi ECA leysir vanda sem við höfum verið að kljást við þegar kemur að því að veita þjálfurum áframhaldandi stuðning eftir að þeir ljúka þjálfaranámskeiði RÍSÍ. ECA veitir þjálfurum aðgang að æfingagagnagrunni sem tryggir að á hverri æfingu fer fram faglegt og gott starf,” segir Aron.

Haraldur Hugosson, framkvæmdarstjóri ECA segir að það sé draumur að fá að vinna með RÍSÍ að áframhaldandi uppbyggingu ungmennastarfs í rafíþróttum á Íslandi.

„Það starf sem hefur hingað til verið unnið hefur vakið athygli víðsvegar um heiminn og það er von okkar að með miðlægu fræðslu- og stuðningstóli ECA geti íslensk félög bætt um betur og haldið áfram að vera leiðandi afl í rafíþróttum barna og ungmenna á heimsvísu,“ segir Haraldur.

Rafíþróttir