Colin From Accounts: Ástralirnir eru með þetta

Þáttaröðin fjallar um hin einhleypu Gordon (Patrick Brammall) og Ashley (Harriet Dyer). Hún er læknakandidat á sjúkrahúsi og hann rekur brugghús. Þau rekast á hvort annað fyrir tilviljun þegar hún verður valdur af því að hann keyrir á hund. Þar sem þau deila sök í máli fara þau saman með hundinn til dýralæknis.

Hundurinn er það slasaður að hann mun vera hreyfihamlaður það sem eftir er. Því eru góð ráð dýr og Gordon og Ashley þurfa að ákveða hvort eigi að lóga honum eða búa þannig í haginn að hann komist ferða sinna með hjólabúnað festan við afturhlutann (sbr. mynd að neðan). 

Samviskubitið nær yfirhöndinni og þau ákveða að þyrma lífi hvuttans.

Við það flækjast hlutirnir töluvert þar sem hvorugt þeirra er í stöðu til að taka hundinn að sér. Þessir einhleypu og mjög svo þrasgjörnu einstaklingar neyðast því til að deila ábyrgðinni og skutla rakkanum sín á milli. 

Fljótlega kemur þó babb í bátinn þegar Ashley er hent út úr íbúðinni sinni, sem verður til þess að Gordon neyðist til að skjóta skjólshúsi yfir hana. Þar sem þau eru nú orðin sambýlingar tekur hið rokgjarna samband þeirra nýja stefnu.

Hjón leika „the odd couple“

Grunnformúlan er kunnugleg, Gordon og Ashley eru „the odd couple.“ Parið sem rífst en undir niðri kraumar kynferðisleg spenna sem hvorugt þeirra þorir að viðurkenna. Þú þarft ekki að hafa séð mjög margar kvikmyndir eða þáttaraðir til að vita frá fyrstu mínútu hvert sagan stefnir. 

Þó svo að formúlan sé augljós er það ekki þannig að áhorfandinn upplifi nokkurn tíma að niðurstaðan sé augljós. Um leið og við teljum allt dottið í dúnalogn og persónurnar muni ná saman fer allt til fjandans og horfurnar slæmar eftir því. 

Samleikur og tenging þeirra Brammall og Dyer í aðalhlutverkunum er framúrskarandi. Sú staðreynd að þau eru höfundar þáttanna og hjón í raunveruleikanum, hjálpar sjálfsagt töluvert til. 

Þetta er alls ekki ein þessara „svo sætu að þig flökrar við“ þáttaröðum; enda veit ég ekki hvort Ástralir séu færir um að gera slíkt (og þó). Hér fáum við kaldhæðnina ómatreidda, hvort sem það er í formi klósetthúmors eða yfirgengilegra ósmekklegheita. Hið sæta fær þó að fljóta með en aldrei í of miklu magni. 

Það er ekki annað hægt en að hrífast með og Colin From Accounts er einn þessara þátta sem maður rambar óvænt á, gjörsamlega heltekur mann í 8 x 30 mínútur og er svo horfinn. Það eina sem hægt er að vona er að önnur þáttaröð verði gerð. Enn hefur þó ekkert heyrst af því.