SAGA sótti fyrsta sigur tímabilsins

ÍA tók hnífalotuna og ákvað að hefja leik í vörn á Mirage. ÍA-menn hófu leikinn vel og tóku fyrstu þrjár loturnar þar sem Jón Kristján Jónsson, betur þekktur sem j0n, toppaði fellingartöfluna með sjö stykki og AWP í hönd.

SAGA átti þó góða lotu þegar liðið færði sig yfir á B-svæði Mirage, kom sprengjunni niður og tók þar með sína fyrstu lotu í viðureigninni. SAGA-menn rifu sig þá heldur betur í gang en þeir tóku sex lotur í röð til að koma stöðunni í 3-6. 

J0n gerði sér þó lítið fyrir í erfiðri stöðu gegn tveim andstæðingum og plataði leikmann SAGA með því að henda USP-byssunni sinni í gólfið og kláraði lotuna með Vappanum sínum. Leikmenn SAGA kláruðu þó hálfleikinn betur og skiptu um hlutverk með forystuna.

Staðan í hálfleik: 6-9

Leikmenn ÍA hófu seinni hálfleik eins og þann fyrri, en þeir sigruðu fyrstu fjórar loturnar og leikurinn þar með hnífjafn, en eftir 20 lotur var staðan 10-10. 

AWP-spilarar leiksins gripu allt sviðsljósið en báðir virtust þeir ekki geiga skoti. J0n endaði leikinn með 28 fellur og Kristófer Daði Kristjánsson, eða ADHD, var með 26 fellur. Afrek j0n dugðu þó ekki til á endasprettinum, en ÍA náði aðeins einni lotu eftir 20. lotu og SAGA tók sigurinn.

Lokatölur: 11-16