Þór eru Íslandsmeistarar eftir sigur á ríkjandi meisturum

Snorri Már Vagnsson skrifar 18. febrúar 2024 12:35

Allee var í sigurliði Þórs í gær og hefur verið afar mikilvægur leikmaður liðsins allt tímabilið.

Þór varð Íslandsmeistari er liðið sigraði Ljósleiðaradeildina í Counter-Strike í gær. Liðið endaði fjórum stigum á undan NOCCO Dusty eftir að sigra gömlu meistarana í gær.

Dusty hafnaði í öðru sæti deildarinnar með 28 stig. Ármann prýddu neðstu tröppu pallsins með 26 stig í þriðja sæti.

Saga og Breiðablik enduðu tímabilið með jafn mörg stig, en bæði lið voru með 22 stig. Saga hafur þó betur vegna lotumismunar, en Saga er með 25 fleiri lotur unnar en Blikar.

Í sjötta sæti sitja Young Prodigies eftir að hafa betur gegn FH í leik sem reyndist úrslitaleikur um sjötta sætið.

ÍA endaði í áttunda sæti með 12 stig og ÍBV með 4 stig í því níunda. ÍA sigraði engan leik eftir áramót og ÍBV sigruðu ekki neina viðureign en fengu dæmdan sigur, rétt eins og öll önnur lið, gegn Atlantic er þeir skráðu sig úr leik.

Lokastigatöfluna ásamt fleiri gögnum má nálgast á Frag.is

Rafíþróttir Ljósleiðaradeildin