„Væri samt mjög til í að vera betri söngvari“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Rúmlega sex.“

Hvað er það fyrsta sem þú gerir á morgnana?

„Til að vekja ekki aðra fjölskyldumeðlimi læðist ég inn í bílskúr og tek tæplega klukkutíma æfingu þar, annað hvort á hjóli eða léttar lyftingar. Ég gerðist meðlimur hjá World Class árið 2003 og mætti sæmilega reglulega þar til var lokað út af Covid vorið 2020. Keypti þá eitthvað smá dót í bílskúrinn sem ég hef notað síðan. Tíminn nýtist betur svona en að sjálfsögðu ekki sami félagsskapurinn sem er galli. Svo þarf að ganga með hundinn á morgnana en síðustu vikur og mánuði hefur konan mín verið mun duglegri þar en ég.

Reyndar er takturinn aðeins annars á sumrin en þá stekk ég oft út á golfvöll klukkan sex og spila nokkrar holur og tek þá hundinn með. Vegna veðurs var síðasta sumar ekki alveg nógu gott hvað þetta varðar en ég bind miklar vonir við að árið í ár verði miklu betra.“

Hvaða lag frá unglingsárunum er líklegast til að koma þér í dansgírinn?

„Þó það sé kannski ekki endilega mikið danslag þá kemur Blindsker mér alltaf í ákveðinn gír. Frábært lag sem ég er búinn að syngja með frá því á unglingsárunum – væri samt mjög til í að vera betri söngvari.

Ég er alinn upp á Eskifirði þar sem Bubbi var talsvert mikið og spilaði meðal annars nokkrum sinnum fyrir okkur í grunnskólanum þannig að ég er með tónlistina hans aðeins í blóðinu. 

Var jafnframt nokkra daga í strákahljómsveit með skólafélögum mínum, Ragga og Óla Geir. 

Þeir sáu mjög fljótlega að hæfileikar mínir á þessu sviði voru mjög takmarkaðir, komu því á framfæri með kurteisislegum hætti og þar með lauk mínum örstutta tónlistarferli. 

Náði samt að „spila“ nokkur Bubbalög með þeim. Í dag hlusta ég mjög mikið á alls konar tónlist og enn talsvert á Bubba.“

Í hvaða verkefni ertu að vinna helst í þessa dagana?

„Eins og alltaf er mjög margt í gangi hjá okkur hjá Icelandair. Á þessu ári fljúgum við til 62 áfangastaða í farþegaflugi og flugáætlunin verður sú stærsta í 88 ára sögu félagsins. Hjá okkur er því allt á fullu við undirbúning sumarsins. En við erum jafnframt að horfa til lengri framtíðar og erum þessa dagana að stilla upp næsta ári í leiðakerfinu og flugflotamálin erum við að skoða til enn lengri framtíðar. 

Þá er mikil áhersla hjá okkur núna á umbætur í rekstrinum. Við erum að velta við öllum steinum í starfseminni í þeim tilgangi að bæta reksturinn. Við erum þegar farin að sjá verulegan árangur og erum að vinna í um 400 umbótaverkefnum. Okkur hjá Icelandair leiðist því ekkert í vinnunni.

Í þessu töluðu orðum er ég í flugi á leið til Brussel þar sem ég er að fara á stjórnarfund A4E sem eru samtök evrópskra flugfélaga. Slíkir fundir eru haldnir tvisvar á ári og þar hitti ég forstjóra margra evrópska flugfélaga þar sem við ræðum meðal annars samkeppnishæfni evrópska fluggeirans. Fundurinn núna kemur upp á mjög áhugaverðum tímapunkti þar sem það eru umbrotatímar í heimsmálunum og ekki síður vegna þess að Evrópusambandið er búið að átta sig á því að íþyngjandi regluverk hefur haft verulega neikvæð áhrif á samkeppnishæfni Evrópulanda.“

Hvernig skipuleggur þú þig í vinnu?

„Ég byrja daginn yfirleitt mjög snemma til að fá yfirsýn því dagbókin mín er því miður allt of þétt setin af fundum yfir daginn. 

Ég setti mér það markmið fyrir þetta ár að minnka fundarsetu og vera meira á ferðinni um starfstöðvar okkar, spjalla við samstarfsfólk og svo framvegis. 

Þau eru í hringiðunni, í samskiptum við viðskiptavini og vinna mikilvæga vinnu bakvið tjöldin við að halda öllu gangandi hjá okkur. 

Í sannleika sagt er alltaf hægt að gera betur hvað þetta varðar en hvatinn er svo sannarlega til staðar því þetta gefur mér mikla orku og í óformlegum samtölum við samstarfsfólk fær maður mjög góða innsýn inn í hvað gengur vel og hvað má betur fara.“

Hvenær ferðu að sofa á kvöldin?

„Ég reyni alltaf að ná sjö til átta tíma svefni og er því oftast kominn í rúmið ekki seinna en klukkan hálf ellefu og á auðvelt með að sofna.“