„Var með skipt í miðju og notaði ó­hóf­legt magn af geli“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég er yfirleitt vaknaður aðeins á undan vekjaraklukkunni, sem er um eða rétt fyrir klukkan sjö. Ég vil meina að það sé vegna hækkandi aldurs, en konan mín og vinir vilja skella skuldinni á óhóflega koffín neyslu. Ég hef aldrei náð þeim þroska að drekka kaffi, en drekk á móti unglinga-kaffi; Sykurlausa orkudrykki.“

Hvað er það fyrsta sem þú gerir á morgnana?

„Ef ég vakna mjög snemma nýti ég tækifærið og fer í ræktina fyrir vinnu. Það er snilld að ná að byrja daginn þar og enn betra ef hægt er að fara í kaldan pott eftir æfingu. 

En svona venjulega þegar ég vakna um sjö þá vek ég börnin mín þrjú og reyni að eiga smá tíma með þeim ef tími gefst til. Oftast er þó mikill hasar að koma öllum út í daginn á réttum tíma. 

Konan mín á allan heiður að því að allt á okkar heimili gangi upp, ég er meira í því að æsa börnin upp og vera með vitleysu. Þannig að það má segja að hún sé að ala upp fjögur börn að einhverju leyti með mér meðtöldum.

Það eftirminnilegasta úr fermingunni þinni?

Hárgreiðslan er klárlega það eftirminnilegasta úr fermingunni og frá þeim tíma. 

Ég var með skipt í miðju og notaði óhóflegt magn af geli sem stífaði hárið. 

Ég hefði getað staðið undir Hafnarfjallinu án þess að greiðslan myndi haggast, svo mikil var gel notkunin. 

Eins er minnisstætt að ég fékk hljómflutningsgræjur frá foreldrum mínum, sem var vinsælt á þessum árum. Foreldrar mínir sáu líklega fljótt eftir því, þar sem ég hlustaði á 90’s rapp öll kvöld.“

Í hvaða verkefni ertu að vinna helst í þessa dagana?

„Það er mikið um að vera hjá okkur í KAPP en í lok síðasta árs gengum við frá kaupum á bæði amerísku félagi, Kami Tech Inc, ásamt öllum eignum úr þrotabúi Skagans 3X. Við höfum unnið hörðum höndum að tvinna saman þessi félög og ná stöndugum rekstri. 

Stór partur síðustu daga hefur farið í sölumál sem og að undirbúa okkur undir Sjávarútvegssýninguna í Barcelona sem hefst 6. maí. Þar erum við að kynna KAPP samstæðuna. Við erum með bás á sýningunni þar sem við kynnum okkar lausnir fyrir viðskiptavinum, núverandi og nýjum. Þessi sýning var lengi haldin í Brussel en var færð til Barcelona fyrir fáeinum árum, sem var mikið gæfu skref. Hún er einskonar hápunktur ársins fyrir marga í greininni, þarna er mikið um að vera og allir sem tengjast geiranum hittast. Við erum búin að undirbúa okkur vel og hlökkum til sýningarinnar.“

Hvernig skipuleggur þú þig í vinnu?

„Ég er í eðli mínu mjög skipulagður og líður best ef ég hef nokkuð góða yfirsýn. Ég skipulegg fundi vel fram í tímann, ásamt því að blokka tíma til þess að vinna úr verkefnum og tryggja eftirfylgni. 

Á kvöldin fer ég ávallt yfir fundi morgundagsins og tryggi að öllum undirbúningi fyrir þá sé lokið. Í byrjun vinnudags reyni ég að nýta fyrsta klukkutímann til þess að renna yfir ólesinn tölvupóst og svara þeim málum áður en fundarhöld dagsins byrja. 

Ég er alltaf með bók og penna með mér á fundum, en þar tek ég fundarnótur og dreg saman þær aðgerðir sem þarf að ráðast í. 

Í framhaldi fundar deili ég þessum upplýsingum og verkefnum ásamt tímalínu til að tryggja að verkefni fái framgang. 

Ofan á þetta nota ég mikið tól eins og Microsoft Planner og Asana fyrir stærri verkefni sem til dæmis tengjast framleiðslu og þjónustu. Mér líkar að fylgjast vel með sölu- og fjárhagstölum og nýta gögn og mælikvarða til ákvörðunartöku í bland við reynslu.“

Hvenær ferðu að sofa á kvöldin?

„Í gegnum tíðina hef ég verið agalegur með þetta og farið alltof seint að sofa. En síðastliðin ár hef ég verið að reyna snúa þessu við, enda áttað mig á því að svefn er undirstaða góðrar heilsu. Ég reyni í dag að vera kominn uppí rúm um klukkan ellefu og sofnaður fyrir miðnætti. Það gengur ekki alveg alltaf, en þetta er allt að koma.“