Sig­fús Aðal­steins­son: Trömpistinn sem vill bjarga Ís­landi

Sigfús Aðalsteinsson fasteignasali hefur nýlega birst landsmönnum sem forsvari hreyfingarinnar „Íslands, þvert á flokka“, sem vakti athygli þegar hún efndi til fjölmennra mótmæla gegn opnum landamærum á dögunum. Nokkrar stimpingar brutust út þegar mótmælendur úr röðum No Borders reyndu að trufla mótmælin og sökuðu fylkingu Sigfúsar um kynþáttahatur.

Sigfús hefur nú efnt til annarra mótmæla í dag þar sem hreyfingin krefst þess meðal annars að stjórnvöld hætti tímabundið að taka á móti hælisleitendum.

En hver er þessi maður sem birtist landsmönnum skyndilega fyrir sjónir og hefur tekist að sannfæra hundruð manns um að mæta á Austurvöll til að mótmæla opnum landamærum?

Var á myrkum stað og gerðist edrú í þrjá áratugi

Sigfús er fæddur 1961, bjó sín æskuár í Reykjavík en fluttist í Kópavog á unglingsaldri. Hann gekk þar í MK og útskrifaðist þaðan árið 1982. 

Í menntaskóla fékk hann áhuga á leiklist, tók þar þátt í leikklúbbi skólans, og skráði sig seinna í Leikfélag Kópavogs þar sem hann lék meðal annars í leikritinu Vals eftir Jón Hjartarson og Óvæntum gesti eftir Agöthu Christie. 

Á þeim tíma lagði hann einnig stund á nám við Fósturskóla Íslands og skömmu eftir að hann útskrifaðist varð hann forstöðumaður á leikskólanum Austurborg, þá aðeins um 24 ára að aldri. Hann starfaði á Austurborg í um sex ár og gegndi meðal annars störfum í samninganefnd stéttarfélagsins BSRB.

Árið 1990 varð hann fyrsti forstöðumaðurinn á glænýjum tilraunaleikskóla, Klettaborg í Grafarvogi. Gegndi hann því starfi í um fjögur ár en sagði störfum sínum þar lausum í lok árs 1993 eftir að hafa dregið sér fé af leikskólanum. 

Þáverandi borgarritari,  Jón G. Tómasson, sakaði Sigfús um téðan fjárdrátt í viðtali við Eintak í maí 1994 og sagði upphæðina nema um hundruðum þúsunda króna, sem væri miðað við verðlag tæplega fjórföld upphæð í dag. Sigfús gengst við fjárdrættinum í samtali við fréttastofu. Heimildin rifjaði einnig upp málið í nýjasta tölublaði sínu.

Í samtali við Vísi segist Sigfús hafa verið á slæmum stað í lífinu á þeim tíma er hann var sakaður um fjárdrátt.  Hann talar um tímabilið sem lokinn kafla í lífi sínu sem hann sé búinn að gera upp við sjálfan sig. 

Hann hafi drukkið mikið á þeim tíma en nú hafi hann snúið blaðinu við og fagnað 30 árum af edrúmennsku í apríl.

Sneri ekki aftur í leikskóla

Sigfús sneri aldrei aftur til starfa á leikskóla eftir fjárdráttarmálið. Hann hélt á aðrar slóðir, meðal annars veitingabransann, og keypti skemmtistaðinn Púlsinn við Vitastíg sem breyttist seinna í hinn alræmda skemmtistað Bóhem. 

Áttirðu ekki afturkvæmt í leikskólastarf eftir þetta mál?

„Ég vildi bara ekki fara þangað. Ég veit það ekki. Ég var mjög móðgaður,“ svarar Sigfús spurningu blaðamanns og tekur þó fram að hann vilji lítið tjá sig um þetta mál. 

„Þetta mál á sér ákveðnar ástæður og skýringar en ég ætla ekki að fara í það núna. Þetta er búið í mínu lífi.“

Og lífið hélt áfram. Eftir að hafa snúið baki við fóstruferilinn gerðist Sigfús bílasali hjá Ingvari Helgasyni þá um 35 ára, en umrætt fyrirtæki heitir í dag BL. Hann segist seinna meir hafa rekið sitt eigið bílaumboð en kveðst ekki muna nafn þess fyrirtækis enda 30 ár liðin síðan þá.

Upp úr aldamótum sneri Sigfús sér að fasteignabransanum, sem er hans heimavöllur í dag. Hann gerðist sölustjóri hjá Eignarumboðinu og seinna hjá Remax.

En þegar bankahrunið skall á dróst fasteignamarkaðurinn saman og hann sneri sér að nýjum reksti. Hann varð framkvæmdastjóri Rizzo Pizzeria og átti tíundahlut í staðnum í tvö ár. Hann rak að sögn einnig undirfélag veitingastaðarins, Græna risann.

Rizzo pizzeria var nokkuð vinsæll á sínum tíma en varð gjaldþrota árið 2013, skömmu eftir að Sigfús var hættur. Árið 2015 kærði sérstakur saksóknari Bjarna Ásgeir Jónsson, eiganda Rizzo, fyrir skilasvik, samkvæmt frétt Stundarinnar.

Sigfús segist hafa snúið aftur að fasteignabransanum þegar markaðurinn tók við sér eftir bankahrun.  

Í dag vinnur hann á fasteignasölunni Miðbæ við Starmýri og hefur verið löggiltur fasteignasali síðan 2016.  Þá selur hann einnig eignir á Costa Blanca á Spáni undir costablancaeignir.is.

Sigfús á rúmenska konu, Mirelu Radu flugfreyju, en þau hafa verið gift síðan 2007. Sigfús á með fyrri mökum þrjá syni og eina dóttur sem öll eru á fullorðinsaldri í dag auk nokkurra barnabarna.  

Í frítíma sínum hefur Sigfús iðkað golf og lagt marga stund á vélsleðaakstur. 

En nú hefur nýtt áhugamál tekið yfir megni frítíma hans, og er það tilefni þessarar fréttar: „Ísland, þvert á flokka“.

Fjöldahreyfing í fæðingu

Um lok apríl mánaðar stofnaði Sigfús Facebook-hóp, „Ísland, þvert á flokka“, og í gær fagnaði hópurinn 5.000 meðlimum. Sigfús segist við fréttastofu að þátttakan hafi farið fram úr björtustu vonum.  Hann hyggist nú stofna félagasamtök í nafni hreyfingarinnar en hann hafi hingað til staðið sjálfur fyrir kostnaði þeirrar starfsemi sem hverfur um hreyfinguna. 

Hreyfingin vakti sem fyrr segir nokkra athygli síðustu mánaðamót þegar fjöldi fólks safnaðist saman á Austurvelli og krafðist meðal annars að stjórnvöld lokuðu landamærunum alveg. Nokkrir mótmælendur úr röðum mættu í von um að trufla mótmælin og sökuðu fylkingu Sigfúsar um kynþáttahatur. Sem fyrr segir urðu einhverjar ryskingar milli mótmælendahópanna, þó ekki miklar.

Meðal þeirra sem fluttu ræður á mótmælum Sigfúsar voru Margrét Friðirksdóttir, ritstjóri vefsins Fréttin.is, en einnig Brynjar Barkarson, sem skipar nú aleinn hljómsveitina ClubDub eftir að Aron Kristinn yfirgaf tvíeykið, en mikið hefur gustað um Brynjar síðustu vikurnar.

Í aðdaraganda þess að Brynjari var boðinn ræðustóll hafði hann birt færslur á Instagram þess efnis að fólk sem „aðhyltist islam“ væru „blóðsögur“ komið til að „sjuga kerfið þurrt, nauðga og rifa kjaft“ [svo]. Í ræðu sinni á Austurvelli viðraði popparinn meðal annars kenningar sínar um að „glóbalistar“ og „kommúnistar“ væru að tosa í alla spotta svo að til Íslands streymdi fólk sem hefði það að markmiði að „sundra okkur, og einn daginn stjórna okkur gjörsamlega.“

„Íslam,“ sagði Brynjar í ræðu sinni og gaf sér sekúndu þögn svo að áheyndum gæfist kostur á að baula. Í upptöku má heyra einn áheyranda hrópa að þau trúarbrögð eigi „ekki heima hér.“  „Við getum kallað það trúarbragð en við getum líka kallað það hugmyndafræði,“ hélt ClubDub-sveinninn áfram. „Ómenningu,“ bætti einn áheyrandi við.

Baldur Borgþórsson, fyrrverandi varaborgarfulltrúi Miðflokksins, flutti einnig ræðu á mótmælunum en þeir Sigfús hafa vinir í langan tíma. Baldur flytur aftur ræðu á mótmælunum í dag.

Finnast kerfið ósanngjarnt

Það er ljóst að áhyggjur „Íslands þvert á flokka“ snúa að mestu leyti að hælisleitendum. Og með „skynsemi" að leiðarljósi segist Sigfús vilja að hlé verði gert á móttöku hælisleitenda í fimm ár og að kerfið verði endurskoðað frá grunni.

Hælisleitendum sem koma hingað til lands hefur þó fækkað allnokkuð milli ára. Samkvæmt opinberum tölum frá því í apríl hafa 399 manns komið hingað til lands, 58 þeirra fengið vernd en 90 verið synjað. Á sama tímabili í fyrra nam fjöldi umsækjenda 750.

En sú fækkun er ekki nóg að mati Sigfúsar. Því til rökstuðnings bendir hann á í samtali við fréttastofu að hér á landi vanti meðferðarheimili fyrir börn. Það þurfi að forgnagsraða og spara.  „Það er ekki til peningur,“ segir hann. 

Orðræða Sigfúsar, sem og skoðanabræðra hans innan hreyfingarinnar, snýr að mörgu leyti að því að það sé ósanngjarnt að hælisleitendur fái „allt frítt“ meðan sumir Íslengingar standi höllum fæti. Þetta kjarnast í nýlegri Facebook-færsu Sigfúsar, þar sem hann vitnar í ónafngreindan tveggja barna föður sem hafi staðið í forræðisdeilu við konu sína í útlöndum og þurft í 12 ár að „borga alla þjónstu að fullu, læknisþjónustu, tómstundir, skóla, tannlækna“. Sigfús skrifar enn fremur: „Þegar hælisleitandi kemur hingað eru málin ekki svona, þá er allt frítt, leigubílar, læknisþjónusta, tannlæknar, tómstundir, leikskólar, skólakostnaður, húsnæði og hvað eina.“

Facebook-hópurinn

Í kjölfar síðustu mótmæla voru Sigfús og fylking hans sökuð um kynþáttafordóma, ekki aðeins af No Borders heldur hafa jafnvel sitjandi þingmenn slegið á svipaða strengi, mótmælendum til mikillar móðgunar.

Ása Berglind, þingmaður Samfylkingarinnar, kallaði ræðumenn mótmælanna „rasista“ og sakaði þá um að misnota þjóðfánann með því að halda honum á lofti á mótmælum sínum. Margir meðlimir hópsins hafa auk þess fylgt fordæmi Sigfúsar og gert íslenska þjóðfánann að prófílmynd sinni á Facebook.

María Rut Kristinsdóttir, þingmaður Viðreisnar, ýjaði að því að þarna væri á ferð „andúðaráróður öfgaafla“. Kristrún Frostadóttir forsætisráðherra sagði í kjölfar mótmælanna að það væri áhyggjuefni hvernig umræðan í útlendingamálum væri að þróast.

Sigfús hefur aftur á móti ítrekað í viðtölum að hann sé enginn rasisti. „Við erum bara að hugsa um framtíð unga fólksins og okkar,“ sagði hann við fréttastofu á síðustu mómælum. 

Stór hluti færlsnanna á Facebook-vettvangi „Íslands, þvert á flokka“ er á þann veg að hlekk er deilt á frétt um glæpi, hér á landi eða erlendis, og svo oft látið liggja í lofti að það hljóti að vera útlendingum að kenna. Inn á milli má finna færslur um íslam, hlekki á myndbönd auðkýfingin George Soros og fjölda gervigreindasmíðaðara mynda.

Færsla Ingu Jónu Traustadóttur, annars stjórnanda hópsins, vakti einnig sterk viðbrögð á dögunum þar sem hún birti smásögu sem „gæti alveg gerst á Íslandi“ og fjallar um útlendinga sem flytja inn í hús Íslendinga og hrekja þá á endanum á braut.

Freku arabísku börnin og „litfagurt föruneyti“ Sönnu Magdalenu

Sem fyrr greinir snúa áhyggjur margra í hópnum að íslam. Sigfús hefur sjálfur lýst áhyggjum af  „múslimavæðingu“ og að Íslendingar neyðist til að aðlagast að menningarheimi innflytjenda en ekki öfugt.  Í því samhengi hét Sigfús því í viðtali í Bítinu í síðustu viku að hann ætlaði „ekki að hætta að borða svínakjöt.“ 

Spurður út í téð svínakjötsummæli í samtali við Vísi vísar hann til þess að leikskóli nokkur bjóði ekki lengur upp á svínakjöt í mötuneyti sínu.

Ein nýleg færsla Sigfúsar vakti mikil viðbrögð í Facebook-hópnum þar sem hann lýsir ferð sinni á „fjölmenningarhátíð í Húsdýragarðinum“ með barnabörnum sínum síðustu helgi. Þar hafi frekja barna „mest af arabískum uppruna“ verið svo mikil að fjölskyldan hafi ákveðið að fara. Þá hafi hann gengið fram hjá Sönnu Magdalenu Mörtudóttur borgarfulltrúa „ásamt litfögru föruneyti“, sem hefði kallað Sigfús rasista. Samhliða þessu birti hann skjáskot af nafnlausri færslu af Mærðatips þar sem svipuð saga er sögð um æsing í erlendum börnum á sama viðburði í Húsdýragarðinum.

Sigfús hefur að undanförnu þurft að brýna fyrir meðlimum í Facebook-hópnum að halda sig við efnið og ekki rífast um ótengdmál, t.d. málefni trans fólks, þjóðkirkjunnar og fleira. Hann játar að inni í hópnum hafi komið upp atvik þar sem „óæskileg“ umræða hafi fengið að grassera og segist vissulega finna fyrir ábyrgð hvað það varðar. 

Lítið eftirlit sé aftur á móti með því hverjum sé hleypt inn í hópinn, en hann segist standa í ströngu við að vísa fólki úr hópnum sem birtir þessar ósæskilegu færslur. 

„Ég vísa þeim bara úr grúpunni,“ segir Sigfús, sem þurfti meðal annars að loka spjallhóp í nafni hópsins í aðdraganda síðustu mótmælenda þar sem fólk sagðist ætla að beita stuðnignsmenn Palestínu ofbeldi.

Aðdáandi Trumps sem hefur ávallt kosið Sjálfstæðisflokkinn

Sigfús segist ávallt hafa kosið Sjálfstæðisflokkinn en sjálfur aldrei tekið þátt í pólitík. Fyrr en nú. 

Hann hefur á samfélagsmiðlum oft lýst aðdáun sinni á Donald Trump Bandaríkjaforseta en hann viðurkennir þó í samtali við Vísi að hann sé ekki sammála Bandaríkjaforsetanum í einu og öllu.

„Margt sem Trump hefur gert í gegnum tíðina er mjög áhrifaríkt,“ segir Sigfús. „Ég held að ég hafi ekkert verið að dást að ákveðnum atriðum að Trump undanfarið en ég fel það ekkert að margt hjá þesum manni er mjög klárt, mjög yfirvegað. Hann veit hvað hann er að gera.“

Auk þess er Sigfús í samtökunum Þjóðfrelsi, sem hafa nú ákveðið að kæra utanríkisráðherra fyrir meint landráð í tengslum við bókun 35 eins og greint var frá í gær.

Sem fyrr segir stefnir í önnur mótmæli í dag og af Facebook-viðburðinum að dæma virðist áhuginn enn meiri í þetta skipti. Líklega verður þetta ekki það síðasta sem þjóðin fær að sjá af Sigfúsi Aðalsteinssyni fasteignasala.