Meistarinn bestur og hvítur Monster kveikti í Tómasi

Ríkjandi Íslandsmeistarinn í holukeppni, Logi Sigurðsson úr Golfklúbbi Suðurnesja, lék best allra í höggleiknum eða samtals á -4 höggum í nokkuð krefjandi aðstæðum.

GKG-ingarnir Guðjón Frans Halldórsson og Aron Snær Júlíusson komu næstir á eftir Loga á -3 höggum.

Á meðal keppenda er einnig Tómas Eiríksson Hjaltested, nýkominn heim af Opna breska áhugamannamótinu þar sem hann komst í 32-manna úrslit. Fyrrnefndir Logi og Guðjón Frans kepptu einnig á því móti en féllu út fyrir 64 manna útsláttarkeppnina, þó að Logi færi þar í bráðabana.

Lék níu holur á sex undir pari

Í lýsingu frá Íslandsmótinu á golf.is er haft eftir Tómasi að hann hafi verið frekar þreyttur fyrstu níu holurnar í gær en komist í gang eftir einn orkudrykk. „Ég þarf bara að sulla í mig einum hvítum Monster,“ sagði hann og lék svo seinni níu holurnar, á fyrri hringnum, nær óaðfinnanlega eða á -6 höggum – fékk einn örn og fjóra fugla. Orkudrykkurinn virtist þó ekki duga fram í seinni hringinn því Tómas lék hringina tvo samtals á pari og varð í 6.-8. sæti í höggleiknum.

Fimm í bráðabana

Fimm kylfingar enduðu jafnir í 13.-17. sæti og léku í bráðabana um fjögur síðustu sætin í 16 manna úrslitunum. Það voru þeir Böðvar Bragi Pálsson, Axel Bóasson, Kristófer Orri Þórðarson, Arnar Daði Svavarsson og Jóhannes Guðmundsson. Að lokum var það Jóhannes, sem lék til úrslita gegn Loga á mótinu í fyrra, sem varð að sitja eftir.

Sextán manna úrslitin í holukeppninni eru komin af stað og náði Tómas að vinna fyrstu holuna gegn Aroni Emil Gunnarssyni. Kristófer Orri Þórðarson er einnig kominn með holu í forskot gegn Loga eftir þrjár holur.

Hægt er að fylgjast með stöðunni hér en keppt verður í 16-manna og 8-manna úrslitum í dag.