Pfúff: Fjölskyldufrí og syst­kinin enda­laust að rífast

Því já; þetta er einfaldlega eitt af því sem fylgir..... Systkini rífast!

Eða kýta ættum við frekar að segja. Því systkinarifrildi rista nú oftast ekki djúpt. Eru frekar partur af æskunni. Jafnvel rifist meira með mömmu og pabba. Eru síðan hin kurteisustu börn fyrir framan aðra.

En þetta er alþekkt. Og snýst alls ekkert bara um okkar börn. Fyrir utan það að auðvitað eru góðu stundirnar í samverunni miklu fleiri.

Áskorunin snýst hins vegar um hvernig er best að takast á við rifrildi systkinanna. Sem þurfa að láta sér það lynda að vera með hvort öðru út sumarfríið. 

Í Dagens Nyheter má finna nokkur ágætis ráð til að sporna við þessu. Meðal annars:

Það er oft ágætt að taka samtalið um reglur og samskipti áður en lagt er af stað. Því eitt af því sem fylgir sumarfríunum er að við verðum flest öll ofur-spennt fyrir fríinu okkar saman. Sem þýðir að uppsöfnuð spenna er þegar til staðar. Ekki síst hjá þeim yngri.

Þegar þið verðið vör við að rifrildi virðist í uppsiglingu, er oft ágætt að grípa í taumana með því að beina athygli allra að einhverju öðru skemmtilegu. Til dæmis einhverju sem ætlunin er að gera, eða einhverju sem sjá má út úr bílnum og svo framvegis.

Þó er eitt sem allir foreldrar þurfa að passa sig á. Og það er að skipta sér ekki um of af. Því börn þurfa líka að læra að leysa úr hlutunum sjálf. Ein leiðin getur verið að þegar klögurnar byrja, er svarið ykkar einfaldlega; Ég hef fulla trú á að ykkur takist að leysa þetta á góðan hátt og alveg sjálf, þið eruð svo dugleg.

Lykilatriði er að byrja ekki á öskrunum sjálf. Eða réttara sagt; Pirringnum. Skömmunum. Í stað þess að skamma, er betri leið að taka samtalið; Biðja báða/alla aðila um að útskýra sitt sjónarhorn rólega og fallega. Hjálpa þeim síðan að finna lendingu. Með öðrum orðum: Í stað þess að skamma, hjálpið systkinunum að leysa úr málum.

Á skemmtilegum stundum er síðan um að gera að hrósa systkinunum fyrir það hvað þau eru góð saman, dugleg saman, koma vel fram við hvort annað og svo framvegis. Í fríum eins og annars staðar er mikilvægt að einblína ekki á það erfiða, heldur frekar að virkja og efla allt það jákvæða.

Ýmsir greinahöfundar benda síðan á það góða ráð að skipta upp foreldratíma með börnum í fríi. Sem bæði gefur systkinum smá hvíld frá hvort öðru, en getur líka verið spennandi samvera með aðeins öðru foreldrinu í smá tíma. 

Áður en lagt er af stað er líka tilvalið að foreldrar séu búnir að skipuleggja einhverjar skemmtilegar samverustundir saman. Eitthvað sem fjölskyldan getur gert öll saman og systkinin líka ein og sér. Alls konar er hægt; Að lita saman, spila saman, lesa sögur saman og svo framvegis.

Hér að neðan er fróðlegt viðtal við sálfræðing um hvers vegna það skiptir máli að takmarka skjátíma barna - og fullorðna - til dæmis þegar ferðast er.