Hneykslast á kostnaði við kveðju­veislu Þóris og Lio

Í ljós er komið að norska handboltasambandið eyddi meira en tveimur milljónum norskra króna í hátíðarhöldin eða meira en 24 milljónum í íslenskum krónum.

Norska ríkisútvarpið skrifar um hneykslun og hörð viðbrögð við kostnaðinum.

Veislan var haldin til að þakka þeim Þóri og Lio fyrir langa þjónustu þeirra við norskan handbolta.

Þórir hafði verið aðalþjálfari norska kvennalandsliðsins í sextán ár og aðstoðarþjálfari í átta ár þar á undan. Norska kvennalandsliðið vann ellefu gullverðlaun og sautján verðlaun á stórmótum undir hans stjórn.

Lio var formaður norska sambandsins frá 2015 til 2025.

„Það er algjörlega klikkað að þeir leyfi sér að eyða þessum upphæðum í áfengi, partý og sig sjálfa á sama tíma og félögin þarna úti eru í vandræðum með að ná endum saman,“ sagði Oda Sjøvoll hjá Linderud Linje 5 Håndball.

Norska ríkisútvarpið fékk að skoða reikningana en meðal annars var keyptur matur og drykkir fyrir þrjú hundruð þúsund norskar krónur á hátíðarmálsverðinum eða fyrir 3,6 milljónir íslenskra króna.

Alls fóru 250 þúsund norskar krónur í áfengi þessa helgi eða meira en þrjár milljónir íslenskar.

Norska handboltasambandið segir að þetta sé reikningur fyrir fimm til sex klukkutíma veislu með yfir tvö hundruð gestum.

NRK hafði samband við norsk handboltafélög til að fá viðbrögð. Margir brugðust illa við en flest vildu ekki rugga bátnum. 

Það er hins vegar ljóst að mörg af norsku handboltafélögum glíma við fjárhagsvandræði og eitt besta kvennahandboltalið Evrópu, Vipers frá Kristanstand, fór sem dæmi á hausinn í vetur.