Hlynur Pálma­son með þrennu í San Sebastian

Nýjasta kvikmynd Hlyns, Jóhanna af Örk, sem er 62 mínútna löng mynd og gerist í sama heimi og Ástin sem eftir er, verður heimsfrumsýnd í Zabaltegi-Tabakalera-flokki kvikmyndahátíðarinnar.

Einnig verður Ástin sem eftir er sýnd í Perlak-flokki hátíðarinnar, sem samanstendur af bestu myndum ársins til þessa sem enn hafa ekki verið sýndar á Spáni. Meðal annarra leikstjóra sem eiga myndir í Perlak-flokki ársins eru Richard Linklater, Yorgos Lanthimos, Joachim Trier og Noah Baumbach.

Samhliða sýnir Tabakalera einkasýningu á innsetningum Hlyns, Harmljóð um hest, Eins Vetra og Upphaf og Endir, verk sem undirstrika feril hans sem leikstjóra og myndlistarmanns.

Jóhanna af Örk byggð upp og skotin niður

„Mér er mikill heiður sýndur, að fá boð um að taka þátt á San Sebastián hátíðinni með tvær kvikmyndir og listsýningu. Þetta er tækifæri til að sýna hvernig vinna mín á mörkum kvikmynda og myndlistar talar saman og opnar nýja frásagnarmöguleika“ segir Hlynur Pálmason.

Jóhanna af Örk fjallar um þrjú börn sem smíða riddarafígúru til að nota sem skotmark fyrir örvar. Í gegnum árstíðirnar sjá áhorfendur þau byggja upp og rífa niður þetta einstaka sköpunarverk sitt.

Hlynur hefur áður notið velgengni á San Sebastian hátíðinni, sem er ein af stærstu og virtustu kvikmyndahátíðum Evrópu. Síðasta mynd hans, Volaða Land (2022), hlaut Zabaltegi-Tabakalera verðlaunin árið 2022 og stuttmynd hans Hreiður var einnig sýnd á hátíðinni.

Jóhanna af Örk er framleidd af Antoni Mána Svanssyni fyrir STILL VIVID á Íslandi, í samstarfi við Katrin Pors fyrir Snowglobe í Danmörku. Með helstu hlutverk fara þau Ída Mekkín Hlynsdóttir, Þorgils Hlynsson, og Grímur Hlynsson en öll þrjú eru börn Hlyns.

Hlynur fór með síðustu kvikmynd sína, Ástina sem eftir er, á Cannes í maí og hefur síðan þá farið víðar með hana.