Viðskipti innlent

Fimm prósenta aukning í septem­ber

Atli Ísleifsson skrifar
Bogi Nils Bogason, forstjóri Icelandair, segir markmið félagsins vera að vaxa utan háannatíma.
Bogi Nils Bogason, forstjóri Icelandair, segir markmið félagsins vera að vaxa utan háannatíma. Vísir/Vilhelm

Icelandair flutti alls 479 þúsund farþega í september sem er aukning um fimm prósent á milli ára. Vöxturinn var mikill á markaðnum til Íslands, þar sem farþegafjöldi jókst um 15 prósent milli ára, og á markaðnum frá Íslandi þar sem aukningin var 12 prósent, sem er sagt endurspegla áherslu félagsins á þá markaði.

Þetta kemur fram í tilkynningu frá Icelandair. Þar segir að í septembermánuði hafi 34 prósent farþega verið á leið til Íslands, 17 prósent frá Íslandi, 44 prósent verið tengifarþegar og fimm prósent ferðast innanlands.

„Sætanýting nam 81,7% og stundvísi var 87,2%, sem er aukning um 0,6 prósentustig samanborið við síðasta ár. Það sem af er ári hafa 3,9 milljónir farþega flogið með Icelandair, sem eru 7% fleiri en á sama tímabili í fyrra.

Leiguflugsstarfsemin hélt áfram að vaxa með 3% aukningu í seldum blokktímum á milli ára og 38% aukningu frá ársbyrjun. Fraktflutningar, mældir í tonnkílómetrum, drógust saman um 12%, en hafa aukist um 2% það sem af er ári. Kolefnislosun á hvern tonnkílómetra dróst saman um 1%,“ segir í tilkynningunni.

Markmiðið að vaxa utan háannatíma

Haft er eftir Boga Nils Bogasyni, forstjóra Icelandair, að félagið haldi áfram að sjá hlutfall farþega til og frá landinu aukast.

„Heildarfjöldi farþega jókst um 5% í samanburði við september 2024 sem er í takt við markmið okkar um að vaxa utan háannar til að jafna árstíðarsveiflu í starfseminni og til að hámarka nýtingu innviða félagsins. Í mánuðinum hófum við flug til fjögurra nýrra áfangastaða og síðar í þessum mánuði bætum við þeim fimmta við, Miami í Flórída. Það er mjög ánægjulegt að sjá áframhaldandi frábæra stundvísi. Þessi árangur er fyrst og fremst að þakka frábærri frammistöðu starfsfólks félagsins og áframhaldandi áherslu okkar á skilvirkni í rekstrinum,“ segir Bogi Nils.






Fleiri fréttir

Sjá meira


×