Hagar högnuðust um 3,7 milljarða króna

Framlegð, það er mismunur á tekjum og kostnaði fyrirtækisins, jókst á sex mánaða tímabilinu. Mældist framlegðarhlutfall nú 24,5 prósent samanborið við 21,7 prósent á sama tímabili í fyrra. Fyrri helmingur rekstrarársins og umrætt tímabil nær yfir 1. mars til 31. ágúst 2025.

Hagnaður Haga nam 3,7 prósent af veltu á fyrri helmingi rekstrarársins en var 2,8 prósent í fyrra. Eigið fé Haga nam 39.302 milljónum króna í lok ágúst og var eiginfjárhlutfall 36,3 prósent.

Færeyska verslunarkeðjan SMS varð hluti af samstæðu Haga á fjórða ársfjórðungi 2024/25 og hefur áhrif á samanburðartölur. Til að mynda mælist framlegðarhlutfall á öðrum ársfjórðungi 24,8 prósent og hækkaði um 3,0 prósentustig á fjórðungnum en nemur 23,9 prósent án áhrifa SMS.

Rekstur Olís og SMS gengið vel

Stjórnendur Haga segja að sterk afkoma sé einkum tilkomin vegna góðs reksturs Olís en einnig hafi rekstur SMS í Færeyjum gengið vel og eftirspurn á dagvörumarkaði verið kröftug.

Vegna góðs gengis var afkomuspá stjórnenda fyrir allt rekstrarárið 2025/26 hækkuð um milljarð króna í september og gerir hún ráð fyrir að hagnaður fyrir afskriftir, fjármagnsliði og skatta (EBITDA) verði á bilinu 17.000 til 17.500 milljónir króna.

Greint er frá þessu í tilkynningu Haga til Kauphallar. Þar segir að heimsóknum í dagvöruverslanir Bónuss og Hagkaups hafi fjölgað um tæp 5 prósent á öðrum ársfjórðungi. Þá hafi seldum eldsneytislítrum hjá Olís fækkað um 2 prósent.

Vörusala aukist um ellefu prósent

Finnur Oddsson, forstjóri Haga, segir í tilkynningu til Kauphallar að vörusala Haga á öðrum ársfjórðungi hafi aukist um um 11,2 prósent miðað við sama tímabil í fyrra og numið 51.817 milljónum króna. Þá hafi verið töluverð aukning í framlegð, EBITDA og hagnaði.

„Rekstur gekk vel á fjórðungnum en í samanburði við fyrra ár er mikilvægt að horfa til þess að SMS í Færeyjum er nú hluti af samstæðu Haga, sem og til þess að heimsmarkaðsverð olíu lækkaði á milli ára.“ Viðskiptavinum sem heimsæki dagvöruverslanir félagsins haldi áfram að fjölga og seldum stykkjum einnig. Umsvif Bónus aukist milli ára og tekjuaukning og fjölgun viðskiptavina mælist hjá Hagkaup.

„Rekstur Olís gekk vel á sumarmánuðum og styrktist afkoma umtalsvert á milli ára. Tekjur voru 14,1 ma. kr. og drógust saman um tæp 5%, sem skýrist aðallega af lækkun á heimsmarkaðsverði olíu miðað við fyrra ár, en selt magn til stórnotenda dróst einnig lítillega saman.“

Boðar vildarkerfi

Finnur segir uppgang í starfsemi SMS í Færeyjum, meðal annars í dagvöruverslun og rekstri veitingastaða. Tekjur hafi aukist umtalsvert milli ára og afkoma verið vel umfram áætlanir.

Þá boðar Finnur tilkomu vildarkerfis Haga. „Til framtíðar er gert ráð fyrir því að vildarkerfi Haga skapi undirstöðu til að veita viðskiptavinum fjölbreytta og bætta þjónustu á vettvangi Haga og samstarfsaðila.“

Finnur bætir við að ákveðinn árangur hafi náðst í lækkun á vöruverði Bónus fyrri helmingi rekstrarársins. Þrátt fyrir það sé matarverðbólga enn of há.

„Við treystum því að birgjar okkar gæti sérstaks aðhalds í verðhækkunum og um leið vonumst við til þess að stjórnvöld stuðli að stöðugleika og jafnvel lækkun verðlags á dagvöru.“

„Heilt yfir erum við ánægð með þróun samstæðu Haga þar sem áherslan síðustu tæp tvö ár hefur annars vegar verið á skilvirkni í rekstri og hins vegar á uppbyggingu nýrra stoða og tekjustrauma innan núverandi rekstrar. Góð byrjun á yfirstandandi rekstrarári endurspeglar að okkur miðar vel, afkoma er umfram áætlanir og við sjáum tækifæri til að styrkja starfsemi og rekstur enn frekar. Hagar búa að traustum fjárhag, öflugum rekstrarfélögum og frábæru starfsfólki sem leggur sig fram um að bæta lífskjör fjölda viðskiptavina sem sýna rekstrarfélögum okkar hollustu á hverjum degi. Þess vegna er staða Haga sterk og horfur í rekstri góðar,“ segir Finnur að lokum.