Stökkir ostabitar í pistasíuhjúp

Svava Marín Óskarsdóttir skrifar 7. nóvember 2025 13:02

Hér er á ferðinni Brie-ostur í stökkum pistasíuhjúp, með heitu hunangi og rifsberjum. Gotteri.is

Hér er á ferðinni öðruvísi og bragðgóð útgáfa af bökuðum Brie-osti. Blanda af stökkum pistasíuhjúp, heitu hunangi og rifsberjum er ómótstæðileg. Berglind Hreiðarsdóttir hjá Gotterí og Gersemum á heiðurinn af þessari uppskrift, sem er tilvalin til að bjóða upp á í saumaklúbbnum eða á aðventunni.

Stökkir Brie-bitar í pistasíuhjúp

Hráefni- átján bitar

2 x Bónda Brie ostur
1 egg
40 g Panko rasp
50 g pistasíukjarnar
2 tsk. saxað ferskt rósmarín
½ tsk. salt
½ tsk. pipar
2 msk. chilli hunang
Rifsber
Olía (grænmetis) til steikingar

Aðferð:

Byrjið á því að skera rúnnaða hlutann af ostinum og útbúa ferhyrning úr honum. Skerið hvorn ost um sig í níu bita.
Setjið bitana í frysti í 10 til 15 mínútur.
Pískið egg í skál og saxið pistasíukjarnana smátt niður.
Blandið raspinum, pistasíuhnetunum, rósmaríni, salti og pipar saman í aðra skál. Geymið smá af pistasíunum til að strá yfir í lokin.
Takið bitana úr frystinum, veltið þeim upp úr eggjablöndunni og næst pistasíublöndunni. Endurtakið og hjúpið þannig hvern bita tvisvar sinnum.
Setjið þá aftur inn í frysti í u.þ.b. tíu mínútur.
Hitið olíu á lítilli pönnu á meðalhita. Gott er að hún sé með eins sentimetra brún.
Steikið hvern bita í eina til tvær mínútur á hvorri hlið, eða þar til að bitarnir eru orðnir gullinbrúnir. Snúið þeim varlega við með töng og leggið á eldhúspappír þegar þeir eru tilbúnir svo að fitan leki vel af.
Raðið loks bitunum á diskinn, bætið chilli-hunanginu yfir, setjið rifsber ofan á og stráið smá af pistasíuhnetunum yfir.