„Af hverju fara Hafn­firðingar með stiga í búð?“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna yfirleitt við það að vekjaraklukkan vekur mig klukkan 6:30. Svo snúsa ég yfirleitt tvisvar til þrisvar og fer á fætur um 6:50, nema þegar ég er að fara í ræktina. Þá vakna ég 5:20, skelli mér í æfingagallann og er lagður af stað um 5:35 í tíma sem byrjar klukkan 6:00. Frábær leið til að byrja daginn.

Fjölskyldan er almennt frekar snemma á ferðinni; sonur minn mætir á sundæfingu klukkan 6:00 alla morgna og frúin fer í ræktina klukkan 6:00 dagana sem ég reyni að sofa aðeins lengur eftir að vakna við vekjaraklukkuna hennar.“

Hvað er það fyrsta sem þú gerir á morgnana?

„Á þriðjudögum og fimmtudögum byrja ég daginn á að fara í TRX / Rope Yoga hjá Elínu Sigurðardóttur sem rekur elin.is. Ég hef stundað það í um fimmtán ár og það er eitt það besta sem ég hef kynnst til að viðhalda styrk og heilsu – og skemmtilegur félagsskapur.

Þegar ég kem heim úr ræktinni er rútínan sú sama og hina dagana: sturta, föt og svo að vekja yngsta barnið. Á sumrin víkur TRX fyrir golfi og við vinirnir mætum oft fyrir klukkan 6:00 út á golfvöll og tökum 9 holur fyrir vinnu.

Þegar ég er kominn niður í eldhús er það nánast alltaf mitt fyrsta verk að taka úr uppþvottavélinni. Ég fæ mér svo morgunmat, fletti í gegnum Morgunblaðið, skoða aðra fréttamiðla á netinu og hlusta á Rás 2. 

Við hjónin ræðum stundum kvöldmatinn – með læknanema og tvo sundmenn á heimilinu þarf að púsla þessu vel saman.“

Ef þú hefðir 10 sekúndur til að segja fyndinn brandara, myndi þér takast það?

„Já, ég held það. Þá myndi ég grípa einhvern sígildan gamlan Hafnarfjarðarbrandara. ‘Af hverju fara Hafnfirðingar með stiga í búð? Því verðið er svo hátt.’

Ég er pabbabrandarakall og þreytist ekki á því að snúa einhverju upp í brandara. 

Þau sem eru á pabbabrandaravagninum hlæja vel – hinir ranghvolfa augunum.“

Í hvaða verkefni ertu að vinna helst í þessa dagana?

„Ég tók við sem framkvæmdastjóri Sensa 1. september síðastliðinn og það er alltaf mikið að gera í byrjun þegar maður tekur við nýju hlutverki. Ég er að koma mér inn í ný viðfangsefni, móta hvernig ég vil sjá ýmis mál þróast áfram hjá okkur og koma nýjum aðila inn í mitt fyrra starf, en ég var öryggisstjóri Sensa í tíu ár.

Ég er líka nýkominn af tveggja daga vinnufundi með stjórn Sensa í Zürich sem var mjög gagnlegur og uppbyggilegur.

Helstu verkefnin þessa dagana eru að klára áætlanagerð fyrir næsta ár, fylgja eftir breytingum sem við gerðum á skipulagi Sensa í september og vinna með móðurfélaginu að útfærslum á ýmsum breytingum. Síðustu mánuðir ársins eru yfirleitt annasamir hjá Sensa og verkefnin fjölmörg.“

Hvernig skipuleggur þú þig í vinnu?

„Ég er frekar skipulagður almennt og það sama gildir um vinnuna. Ég þarf að hafa góða yfirsýn og ég er ekki gaurinn sem gerir glærurnar kvöldið áður.

Til að halda utan um verkefnin nota ég excel-form sem ég bjó til fyrir um 25 árum. 

Það varð til einn föstudag þegar ég sá fram á vinnu alla helgina – verkefnin voru svo mörg. 

Sem betur fer tók skipulagseðlið yfir og ég setti upp skjal með verkefnalista og dreifingu þeirra yfir næstu tvær vikur. Þá sá ég að óreiðan var mest í hausnum á mér og ég þurfti ekki að vinna umrædda helgi. Skjalið hefur tekið breytingum í gegnum árin en er enn mjög einfalt. 

Ég nota einnig „tasks“ í Outlook til að fylgja eftir tölvupóstum. Ég reyni líka að haga málum þannig að ég eigi helgarnar fríar og bæti þá frekar á mig vinnu eftir kvöldmat virka daga ef þurfa þykir.“

Hvenær ferðu að sofa á virkum kvöldum?

„Síðustu ár hef ég verið frekar agaður með svefninn. Góður nætursvefn er lykilatriði inn í nýjan dag. Ég reyni að vera sofnaður fyrir klukkan 23:00. Oft fer ég fyrr upp í rúm og horfi á eitthvað, en ég reyni alltaf að sofa ekki seinna en 23:00 – og slekk þá bara í miðjum þætti ef svo ber undir.“