Örgleði (ekki öl-gleði)

Örgleði er smá trend í atvinnulífinu núna. Að minnsta kosti hefur verið nokkuð um þetta ritað erlendis síðustu misseri.

Og ekki annað að sjá en að örgleði sé eitthvað sem fólk segir að virki.

En hvað er örgleði?

Jú, örgleði er nákvæmlega það sem orðið ber með sér; að vera pínkulítil smá stund af gleði. Og ástæðan fyrir því að örgleði er sögð virka svo vel er að hún gerir okkur virkari í að taka eftir og njóta allra litlu hlutanna eða litlu augnablikanna í daglega lífinu.

Allt eitthvað sem er í kringum okkur nú þegar en okkur lærist betur að taka eftir.

Og æfum okkur í að njóta!

Sú sem kynnti örgleðina til leiks heitir Cyndie Spiegel, sem í kjölfar áfalla í lífinu notaði það sem sína sjálfshjálparleið að fara að taka betur eftir öllu því fallega eða gleðilega í daglega lífinu. Á endanum skrifaði hún síðan bókina Microjoys: Finding Hope (Especially) When Life Is Not Okay.

Margir viðurkenna þó að hafa haft litla trú á örgleðinni í upphafi. Aðferð örgleðinnar sé bara eitt af þessum mörgu nýju tískufyrirbrigðum sem koma og hverfa síðan. Vinnustaðir taka þetta upp í millitíðinni sem leið til að efla sitt fólk.

En fólk er þó hvatt til að prófa sig áfram í örgleðinni. Því þótt fólk hafi ekki trú á aðferðarfræðinni í upphafi virðist hún vera að reynast mörgum vel.

Þar á meðal ritstjóri Global Brand Magazine, sem hafði enga trú á þessu í upphafi en þurfti vinnu sinnar vegna að prófa í smá tíma. Í dag segist hún nota símann sinn til að minna sig á örgleðina á hverjum degi.Og fyrir vikið er hún að taka eftir og njóta hluta eins og:

Lyktinni úti þegar það rignir

Skriftinni hjá vinnufélaga sem skrifaði lítinn post-it-minnismiða

Mómentunum sem geta verið svo skemmtileg hjá vinnufélögum, rétt áður en fundur hefst.

Allt eru þetta atriði sem dags daglega þjóta vanalega fram hjá okkur. En með því að æfa okkur í örgleði er ekki annað hægt en að taka eftir einmitt öllum þessum litlu mómentum.

Vinnustaðir eru líka sagðir uppskera ríkulega af því að innleiða örgleði á vinnustöðum sem hluta af menningu. Því örgleði eflir alla hugsun um til dæmis „Hvernig skörum við fram úr?“ eða „Hvernig upplifir fólk okkur eða okkar vöru og þjónustu?“ og svo framvegis. Meðvitundin okkar verður einfaldlega meira vakandi yfir öllum smáatriðum. Ekki síst þeim jákvæðu.

Fyrir þá sem vilja prófa að æfa sig er mælt með eftirfarandi æfingu:

Hvað í kringum mig akkúrat núna veitir mér smá gleði þótt þetta séu bara litlir hlutir eða augnablik?

Því allir geta fundið eitthvað. Snýst bara um hvað?