Engin naglalögregla á HM kvenna en nýjar reglur um neglur

Langar og gervineglur eru nefnilega stórt vandamál á handboltavellinum. Nú eiga leikmenn á hættu að vera sendir í búningsklefann ef neglurnar eru of langar. Langar og gervineglur hafa valdið alvarlegum meiðslum á handboltavellinum, þar á meðal skurðum sem þurfti að sauma.

Ný regla í alþjóðlegum handbolta krefst þess að leikmenn séu með stuttar neglur til að forðast meiðsli.

Það er á ábyrgð liðsstjóra að tryggja að leikmenn fylgi reglunum því það verða ekki framkvæmdar kerfisbundnar naglaskoðanir af dómurum fyrir leiki.

Sendar inn i klefa í klippingu

Dómarar geta hins vegar tekið á slíku í leikjum. Brot á reglunni getur leitt til þess að leikmenn verði sendir í búningsklefann og fái ekki að spila fyrr en neglurnar eru nógu stuttar.

Reglan hljómar þannig: Bannað er að vera með hluti sem geta skaðað aðra leikmenn eða veitt leikmanni ótilhlýðilegt forskot. Þetta nær til dæmis yfir höfuð- eða andlitshlífar, hanska, armbönd, úr, hringa, sýnileg göt, hálsmen eða keðjur, eyrnalokka, gleraugu með harðri umgjörð eða án festingar, hluti sem geta valdið skurðum og sárum (fingurneglur verða að vera stuttar) eða aðra hluti sem geta verið hættulegir.+

Per Morten Sødal er dómarastjóri hjá Alþjóða handknattleikssambandinu.

„Leikmaðurinn sjálfur verður að yfirgefa völlinn og fær ekki að spila aftur fyrr en það er komið í lag,“ útskýrir Södal í samtali við norska ríkisútvarpið.

Hann leggur þó áherslu á að ekki sé gert ráð fyrir mikilli naglaskoðun þegar heimsmeistaramótið í handbolta hefst í þessari viku.

Þurfa ekki að sýna neglurnar fyrir leik

„Það verður engin naglalögregla. Þær þurfa ekki að standa og sýna neglurnar fyrir leik, svo það sé sagt hreint út. Þetta er fyrst og fremst á ábyrgð leikmanna og liðsstjóra. En ef maður sér einhvern með of langar neglur fyrir leik, þá verður auðvitað bent á það,“ sagði Södal.

Tilkynningar um nokkur ljót meiðsli urðu til þess að dómarastjórinn Espen Modahl hjá norska handknattleikssambandinu ákvað að grípa til aðgerða.

„Við höfum fengið nokkrar tilkynningar um meiðsli vegna langra nagla eða gervinagla sem hafa valdið meiðslum bæði á höndum og í andliti með skurðum sem þurfti að sauma,“ sagði Espen Modahl við NRK.

Atvikin sem hann vísar til hafa átt sér stað í neðri deildum í Noregi og í yngri flokkum.

Voru ansi ljót sár

Modahl leit meiðslin svo alvarlegum augum að hann ákvað að koma málinu áfram til alþjóðasambandsins. Per Morten Sødal, yfirdómari alþjóðasambandsins, átti ekki í neinum vandræðum með að breyta reglugerðinni.

„Þetta voru ansi ljót sár. Það var í raun engin mikil umræða um þetta. Okkur fannst þetta skynsamlegt,“ sagði Sødal.