Ná­grannar kveðja endan­lega í dag

Nágrannar þekkja það að binda endi á sögur karaktera sinna, láta þá snúa aftur og jafnvel ganga frá þeim í annað sinn. Serían hefur sjálf upplifað það, var fyrst tekin stuttlega af dagskrá eftir fjögurra mánaða göngu 1985 og síðan aftur 2022. En nú hefur leikmynd seríunnar, sem staðið hefur í fjörutíu ár, verið tekin í sundur og leikarar leitað á önnur mið: Ramsay-stræti hefur sungið sitt síðasta.

„Maður finnur fyrir deja vu,“ sagði yfirframleiðandinn Jason Herbison í viðtali við BBC um tímamótin. Eftir að Channel 5 ákvað að hætta að sýna þættina endaði serían á stjörnum prýddum lokaþætti með Hollywood-stjörnunum Margot Robbie og Guy Pearce, sem slitu barnskónum í þáttunum, tónlistarkonunni Kylie Minogue og söngvaranum Jason Donovan.

Mörg hundruð manns söfnuðust saman á Federation-torgi í Melbourne til að fylgjast með endinum á stóra skjánum og BBC var með lifandi vakt vegna tímamótanna. Skömmu eftir að sá lokaþáttur fór í loftið bárust hins vegar fregnir af því að þetta væru ekki endalokin, Amazon MGM Studios tók Nágrannana upp á sína arma.

Sviptingarnar voru svo skjótar að Pearce grínaðist með að kveðjugjöfinni sem Robbie sendi á framleiðendurnar, kassa af kampavíni, yrði skilað. En endurkoman entist stutt. 

Fyrr á þessu ári tilkynnti Amazon að serían myndi enda í desember, fjörutíu árum og rúmlega níu þúsund þáttum síðar. Þátturinn verður ekki jafn stjörnum hlaðinn og síðast en mun vafalaust nísta enn dýpra.

Þátturinn verður síðan sýndur hérlendis á Sýn þann 24. febrúar næstkomandi.