Dagur og læri­sveinar í undan­úr­slit og sendu Ís­land niður í annað sætið

Lærisveinar Dags Sigurðssonar í króatíska landsliðinu unnu endurkomusigur á Ungverjum í kvöld og tryggðu sér með því sæti í undanúrslitum á Evrópumótinu í handbolta.

Króatía vann leikinn á endanum með tveimur mörkum, 27-25, en það urðu mikil læti á milli liðanna í leikslok.

Ungverjar voru yfir stærstan hluta leiksins en sigur þeirra hefði tryggt íslenska liðinu sigur í riðlinum. Króatar vinna hins vegar milliriðilinn og Ísland endar í öðru sætinu.

Ungverjar voru næstum því örlagavaldar í íslenska milliriðlinum annað daginn í röð þrátt fyrir að þeir hafi sjálfir ekki verið nálægt því að komast í undanúrslitin. Eftir að hafa tekið stig af Svíum í gær fylgdu Ungverjar því síðan eftir með því að stríða lengi Króötum í kvöld.

Þrátt fyrir dökkt útlit á tímabili komu lærisveinar Dags til baka og unnu gríðarlega mikilvægan sigur. Þetta voru um leið slæm úrslit fyrir Svía sem unnu fjóra fyrstu leiki sína í mótinu en komust síðan ekki í undanúrslitin.

Þetta er í fyrsta sinn í sex ár sem Króatar komast í undanúrslitin á Evrópumótinu en Dagur er að fara með liðið í undanúrslit á öðru stórmótinu í röð því liðið vann silfur á heimsmeistaramótinu fyrir ári síðan.

Ungverjar höfðu að engu að keppa í þessum leik en þeir stígðu Króötum strax frá byrjun leiks. Ungverska liðið komst í 6-2 í upphafi leiks og Króatar voru alltaf að elta eftir því.

Ungverska liðið var lengi með fjögurra marka forskot í hálfleiknum en Króatar komu sér aftur inn í leikinn undir lok hálfleiksins. Munurinn fór niður í eitt mark en það munaði tveimur mörkum á liðunum í hálfleik, 15-13 fyrir Ungverja.

Króatar lentu fjórum mörkum undir, 19-15, en voru síðan búnir að jafna metin í 20-20.

Þeir tóku síðan frumkvæðið og lönduðu mikilvægum sigri á lokamínútunum.