Antonelli yngstur til að vera á ráspól í sögu For­múlu 1

Antonelli var 0,222 sekúndum á undan samherja sínum hjá Mercedes, George Russell, sem lenti í vandræðum í tímatökunni í morgun. Hann náði þó að bjarga málunum og náði næstbesta tímanum.

Antonelli, sem er átján ára og 212 daga gamall, er langyngsti ökumaðurinn sem hefur náð ráspól í Formúlu 1. Sebastian Vettel átti gamla metið en hann var 21 árs og 72 daga gamall þegar hann náði ráspól fyrir ítalska kappaksturinn 2008.

Mercedes-ökumennirnir verða fremstir þegar kappaksturinn í Sjanghaí hefst á morgun. Þar á eftir koma Lewis Hamilton og Charles Leclerc á Ferrari.

Russell vann fyrstu sprettkeppni tímabilsins í dag. Leclerc og Hamilton urðu í 2. og 3. sæti.

Kínverski kappaksturinn fer fram á morgun. Bein útsending frá honum hefst klukkan 06:30 á Sýn Sport Viaplay.