McIlroy varði Masters-titilinn

McIlroy sló met þegar hann leiddi með sex höggum eftir annan hring mótsins á föstudag en staðan á toppnum jafnaðist mjög eftir strembinn hring hans í gær. McIlroy og Cameron Young voru jafnir á toppnum fyrir hring dagsins á ellefu undir pari en þónokkrir kylfingar fylgdu fast á hæla þeirra.

McIlroy fékk fugl á þriðju braut og þeir Young jafnir þá. Síðan fylgdu skrambi á fjórðu og skolli á þeirri sjöttu, McIlroy á tveimur yfir pari í dag og hann féll niður í fjórða sæti.

Justin Rose minnti á sig um leiddi um stund. Hann náði tveggja högga forystu eftir fugl á níundu braut.

McIlroy var ekki lengi í fjórða sætinu þar sem hann fékk fugl á bæði sjöundu og áttundu braut og gerði það einnig á tólftu og þrettándu. Aðrir gáfu eftir og McIlroy var eftir seinni fuglinn með tveggja högga forystu á 13 undir. Scottie Scheffler var næstur á ellefu undir eftir að hafa leikið á 68 höggum í dag.

Forysta McIlroy hélt til loka. Það var smá stress í upphafshöggi hans á lokaholunni og kúlan lenti á slæmum stað í trjánálum við innan um tré. Annað höggið fór beint í glompu og það fór um mann og annan.

Höggið þaðan fór inn á flöt og hann hafði tvö högg til að klára dæmið. Hann mátti fá skolla þar sem forystan á Scheffler var tvö högg.

Það hafðist. McIlroy fékk skollann en það skipti engu, brosið var breitt og sigurinn vís á ný annað árið í röð.

Scheffler varð annar en þar á eftir voru Justin Rose, Cameron Young, Russell Henley og Tyrrell Hatton á tíu undir pari vallar en Hatton lék þeirra best, á sex undir í dag.

McIlroy kláraði alslemmuna þegar hann fagnaði sigri á Masters í fyrra og vinnur mótið nú í annað sinn. Hann er sá fyrsti til að verja Masters-titilinn í 24 ár en Tiger Woods gerði það árið 2002.

McIlroy er aðeins sá fjórði í sögunni sem nær að verja Masters-titilinn á eftir Woods, Jack Nicklaus og Nick Faldo.

Um er að ræða sjötta risatitil McIlroy á ferlinum.