Einar ein­beitir sér að norður­slóðum og Hjalti tekur við

Í fréttatilkynningu þess efnis segir að Hjalti Már hafi starfað við fyrirtækjaþjónustu hjá Arion í um sextán ár og búi því yfir mikilli reynslu, bæði af lánastarfsemi og fyrirtækjaráðgjöf. Hann hafi leitt fjölmörg stór fjármögnunarverkefni og stýrt umfangsmiklum verkefnum í fyrirtækjaráðgjöf á starfsferli sínum. Hjalti Már sé viðskiptafræðingur frá Háskólanum í Reykjavík og með meistarapróf í fjármálahagfræði frá IESE á Spáni.

Einar Pálmi muni leiða viðskiptastýringu gagnvart innlendum og erlendum fagfjárfestum og stefnumótun og viðskiptastjórnun þegar kemur að innviða- og fjármögnunarverkefnum á norðurslóðum. Arion banki hafi á undanförnum árum aukið lánveitingar til verkefna á norðurslóðum og breytingin nú marki aukna áherslu á slík verkefni. Einar, sem hafi yfir þrjátíu ára reynslu af fjármálamarkaði, sé viðskiptafræðingur frá Háskóla Íslands, með MBA-gráðu frá Rotterdam School of Management, próf í verðbréfaviðskiptum og með ACI Diploma í fjárstýringu og gjaldeyrisviðskiptum.

„Þetta eru spennandi breytingar í fyrirtækjaráðgjöf og breytingar sem munu efla okkur enn frekar í sókn á norðurslóðum. Hjalti Már er reynslumikill þegar kemur að þjónustu við fyrirtæki og þekkir viðskiptavini okkar vel. Einar Pálmi hefur víðtæka reynslu sem nýtist vel í nýju hlutverki. Þessar breytingar munu auka samstarf á milli lánastarfsemi okkar og fyrirtækjaráðgjafar og gera okkur betur í stakk búin til að grípa spennandi tækifæri á norðurslóðum og þar með auka umsvif okkar á svæðinu enn frekar,“ er haft eftir Hákoni Hrafni Gröndal, framkvæmdastjóra fyrirtækja- og fjárfestingarbankasviðs Arion.