Sam­eining tveggja líf­eyris­sjóða sam­þykkt

Í tilkynningu á vef Frjálsa lífeyrissjóðsins segir að sameiningin feli í sér að Frjálsi lífeyrissjóðurinn taki yfir öll réttindi og skyldur gagnvart sjóðfélögum LSB og verði sjóðfélagar hans hluti af Frjálsa. Fyrst um sinn verði þó haldið utan um eignir og áunnin réttindi sjóðfélaga LSB í sér tryggingadeild innan Frjálsa.

„Markmiðið sameiningarinnar er að nýta stærðarhagkvæmni til að lækka rekstrarkostnað, efla þjónustu og upplýsingagjöf til sjóðfélaga og launagreiðenda, minnka rekstraráhættu og um leið styrkja eigna- og áhættustýringu sjóðanna.

Sameiningin er háð samþykki Samkeppniseftirlitsins og staðfestingu fjármála- og efnahagsráðuneytisins á breytingum á samþykktum sjóðanna. Sjóðfélagar þurfa almennt ekkert að aðhafast vegna sameiningarinnar en verða upplýstir um áframhaldandi framgang hennar eftir því sem fyrirvörum sameiningar hefur verið aflétt,“ segir í tilkynningunni.