Nýr kokteilbar opnar á Hverfisgötu: „Okkur langaði bara að opna dyrnar sem fyrst“

Freyja Þórisdóttir skrifar 8. júlí 2026 12:22

Útvarpsmaðurinn Daníel Baróns og barþjóninn Ási á Food and Fun-ráðstefnunni í Turku árið 2015. Aðsend

Kokteilbarinn Resident Room opnar í dag, miðvikudaginn 8. júlí, dyr sínar að Hverfisgötu 26 þar sem veitingastaðurinn Matbar var áður til húsa. Það eru útvarpsþáttastjórnandinn Daníel Jón Baróns sem starfar á Rás 2 og barþjónninn Ásgeir Már Björnsson, sem er nýfluttur aftur heim eftir að hafa starfað lengi erlendis, sem stýra barnum en þeir ætla sér að „hrista rækilega upp í íslensku kokteilsenunni“.

Þeir Daníel, betur þekktur sem Danni, og Ásgeir, af flestum kallaður Ási, hafa báðir áratugareynslu úr skemmtanalífinu en þeir störfuðu lengi saman á Slippbarnum. Margir telja íslensku kokteilbyltinguna hafa hafist innan veggja staðarins og var það þar sem drykkir á borð við Basil gimlet stigu upp á kokteilastjörnuhimininn.

Nafnið Resident Room er dregið af rýminu sem Danni segir vera mjög grand og að góð yfirsýn yfir það sé frá barnum. „Þetta er smá eins og bara svona stórt herbergi og býður upp á svona nett heimilislega nálgun, smá bara svona eins og þú værir að fá fólk yfir bara í drykk bara svona heim til þín.“Aðsend

„Megináhersla staðarins er lögð á framúrskarandi kokteila, vandlega valið vínúrval og glæsilega „hamingjustund“ en einnig verður boðið upp á létta rétti,“ segir þar og jafnframt kemur fram að „hann sé því tilvalinn jafnt fyrir eftirvinnudrykkinn sem og notalegt kvöld í góðra vina hópi“.

Mjúk opnun í kvöld og húllumhæ seinna

Danni segir undirbúning fyrir opnunina hafa gengið mjög vel og að rýmið sé fullkomið fyrir andrúmsloftið sem þeir séu að sækjast eftir að skapa.

„Það er bara búið að ganga sjúklega vel og þetta var ógeðslega flott rými og gert fyrir svona franskan stíl,“ segir hann og bætir við að hann telji eflaust marga hafa litið rýmið hýru auga eftir að í ljós kom að Mat bar væri allur.

Um leið og Ási hafi sagst ætla að flytja aftur heim til Íslands hafi þeir Danni farið að ræða mögulegt samstarf í rýminu.

Eitt af því sem þeir Danni og Ási lögðust fyrst yfir var kokteilseðill staðarins.Aðsend.

„Um leið og hann gaf í skyn að hann væri að fara flytja til Íslands, þá sendi ég á hann,“ segir Danni. Svo hafi þetta rými fallið í þeirra hendur og þannig hafi boltinn farið að rúlla.

Klukkan 16:00 í dag verður svokölluð „mjúk opnun“ á staðnum segir Danni en þá á hann við að það sé ekki eiginlegt opnunarpartý.

„Málið með þessa „mjúku opnun“ er bara að við erum ekki að byrja með opnunarpartí en við erum að sigla af stað og svo verður eitthvað húllumhæ seinna meir. Okkur langaði bara að opna dyrnar sem fyrst í rauninni og fá fólk yfir í huggulegheit.“

Í tilkynningu um opnunina segir að Resident Room sé sérstaklega hugsaður fyrir þrjátíu ára og eldri. Opnunartími staðarins verði frá klukkan 16:00 til 01:00 frá miðvikudögum og fram yfir helgi.

Hann segist hafa hlakkað mikið til og að þeir Ási vonist til að sjá sem flesta í kvöld.

Veitingastaðir Drykkir Áfengi Reykjavík Tímamót

Mest lesið

Fleiri fréttir