Byrjar á ráspól eftir ó­trú­legan lokahring

Lando Norris átti ótrúlegan lokahring í tímatökum fyrir ungverska kappaksturinn í dag. Hann náði að bæta hring Lewis Hamilton í lokin um tólf þúsundustu hluta úr sekúndu. Lando Norris var eini sem náði að bæta sig í seinni hring lokahluta tímatakanna sem tryggði honum ráspólinn.

Í fyrstu tveim hlutum tímatakanna var Lewis Hamilton, ökumaður Ferrari, hraðastur en Lando Norris oc Charles Leclerc voru ekki langt undan. Fyrir lokahringinn í lokahluta tímatakanna var Lewis Hamilton fremstur en hvorki hann né liðsfélagi hans, Charles Leclerc, náðu að bæta seinni hringinn sinn. Lando Norris náði því hins vegar og með því náði hann að tryggja sér ráspólinn fyrir kappaksturinn á morgun.

Max Verstappen lenti í vandræðum á lokahringnum sínum og endaði á að missa stjórn á bílnum sínum við endalok hringsins. Hann náði þó að koma í veg fyrir að bíllinn færi í vegginn og endar á að þurfa að sætta sig við að byrja í sjötta sæti í kappakstrinum á morgun.

Kimi Antonelli, ökumaður Mercedes, er efstur í heimsmeistaramótinu og mun byrja kappaksturinn á morgun í fjórða sæti. Á eftir honum verður Oscar Piastri hjá Mclaren og má því búast við hörðum slag um fyrsta sæti keppninnar á morgun.