Táningur sló 470 metra högg á DP World Tour

Yanhan Zhou hefur gengið undir gælunafninu „Smábarnið“ meðal þeirra sem fylgjast vel með en þeir áhugasömustu hafa vitað lengi af honum.

Nú er sérstaklega eitt högg hans um helgina að fara á methraða um netmiðla. Miðlar DP World Tour vöktu nefnilega athygli á högglengd stráksins en hann er að keppa á danska meistaramótinu um helgina.

DP World Tour er sterkasta atvinnumótaröð karla í golfi í Evrópu, áður þekkt sem Evrópumótaröðin.

Yanhan Zhou lék annan hringinn á fimm höggum undir pari og var átta höggum undir pari eftir tvo hringi sem skilaði honum í níunda sætið.

Hann fylgdi því eftir með þriðja góða hringnum í röð með því að spila á fimm höggum undir pari á degi þrjú. Það skilar stráknum upp í annað sæti á mótinu á þrettán höggum undir pari.

Hann fékk meðal annars fugl á þremur holum í röð á fyrri níu. Þegar hann náði þriðja og síðasta fugli sínum af þessum þremur var hann að spila á fimmtu holunni sem er par fimm hola.

Það var einkum upphafshögg Zhou á þessari fimmtu holu sem vakti athygli því strákurinn sló þá boltann 514 jarda eða 470 metra. Hann var þá bara 105 jördum, 96 metrum, frá par fimm holu eftir aðeins eitt högg.