Síminn orðinn Ásar hf

Kaup Ása hf. á Opnum kerfum og Öryggismiðstöð Íslands voru gerð með fyrirvara um samþykki Samkeppniseftirlitsins. Opin kerfi sérhæfa sig í sölu, ráðgjöf og þjónustu á sviði búnaðar- og hugbúnaðarlausna fyrir fyrirtæki og stofnanir. Öryggismiðstöð Íslands er að sama skapi þjónustu- og tæknifyrirtæki á sviði öryggismála.

Umbreytingar á fjarskiptamarkaði

Það er því umtalsverður umbreytingarfasi sem býr að baki nafnabreytingu Landsímans aldna. Má í hræringum á fjarskiptamarkaði að einhverju leyti sjá svipaða þróun verða og hafði árin áður orðið á smásölumarkaði með tilurð félaga eins og Dranga og Festis.

Nova klúbburinn hf. hefur aðlagað sig að breyttum markaðsaðstæðum fjarskiptafyrirtækja, til að mynda með kaupum á hugbúnaðarfyrirtækinu Ofar sem greint var frá í febrúar síðastliðnum.

Yfirstandandi eru viðræður milli Ása (áður Símans) og Sýnar um kaup á útvarps- og vefmiðlum þess síðarnefnda, þar á meðal Vísi. Forstjórinn María Björk greindi frá því í morgun á hluthafafundi að hún hefði engar nýjar upplýsingar að veita málið. 

Með breyttu skipulagi samstæðunnar er fjarskipta- og miðlarekstur færður í nýtt dótturfélag, sem mun heita Síminn ehf., en hlutverk móðurfélagsins Ása verður að styðja við áframhaldandi vöxt og þróun, að því er segir í tilkynningu.

„Ásar eru nýtt afl á markaði. Nafnabreytingin er stórt skref í enn stærra verkefni, en orðið vísar í áherslu okkar á agaðan vöxt í fleiri áttir sem hverfist ávallt um skýran miðpunkt í traustri og öruggri stafrænni þjónustu,“ er haft eftir Maríu Björk Einarsdóttur, forstjóra Ása, í tilkynningu.

Segja mikil tækifæri fram undan

Segir hún gríðarmikil tækifæri felast í sameinaðri fjártæknistarfsemi samhliða kaupum á Greiðslumiðlun Íslands. Horft sé til erlendra fyrirtækja á borð við Revolut, Klarna, Ramp og Fresha á sviði fjártæknilausna.

„Mörkin milli ólíkra greina í annarri stafrænni þjónustu hreyfast hratt. Við teljum þess vegna mikil tækifæri felast í öðrum kynntum yfirtökuverkefnum sem geta skapað enn meira virði fyrir viðskiptavini, starfsfólk og hluthafa Ása.“

María segir ánægjulegt að þessar breytingar standi yfir á 120 ára afmæli Símans, sem haldið verði upp á í næstu viku.

„Þrátt fyrir að samstæðan taki breytingum munum við tryggja að Síminn haldi áfram að vaxa og dafna, enda byggir hann á sterkum grunni; áratuga sögu af uppbyggingu og rekstri fjarskiptainnviða á Íslandi, sem einkennist af frumkvöðlastarfi, trausti og öryggi í rekstri,“ segir María í tilkynningunni.