Konfektmolarnir sýna hvað lítil breyting getur gert

Starri Freyr Jónsson skrifar 4. nóvember 2026 11:13

Nói Síríus fékk sérstök hvatningarverðlaun fyrir framúrskarandi framtak á sviði sjálfbærni þegar Creditinfo veitti framúrskarandi fyrirtækjum viðurkenningu í Hörpu miðvikudaginn 28. október. Harpa Þorláksdóttir er framkvæmdastjóri mannauðssviðs Nóa Síríus, og Halla Björk Vigfúsdóttir er inngildingarstjóri Nóa Síríus.

Nói Síríus hlaut hvatningarverðlaun Creditinfo og Festu á sviði sjálfbærni árið 2026 fyrir markvisst starf að félagslegri sjálfbærni. Með aðlögun verkefna, þjálfunar og vinnuumhverfis að þörfum einstaklinga með frábrugðna starfsorku hefur fyrirtækið skapað varanleg störf innan hefðbundinnar framleiðslu.

Verðlaunin voru afhent í Hörpu 28. október þegar Creditinfo veitti framúrskarandi fyrirtækjum viðurkenningu fyrir góðan og traustan rekstur sautjánda árið í röð.

Harpa Þorláksdóttir, framkvæmdastjóri mannauðssviðs Nóa Síríus, og Halla Björk Vigfúsdóttir, þroskaþjálfi og inngildingarstjói Nóa Síríus, segja inngildingu birtast í daglegum verkefnum og samskiptum. Harpa segir viðurkenninguna snúa að félagslega þætti sjálfbærninnar og Halla lýsir markmiðinu einfaldlega: „Inngilding er bara staður þar sem allir geta fundið sér stað og sess,“ segir hún. „Bara að allir séu velkomnir.“

Klippa: Fjölbreytileiki starfsfólks er mikilvægur þáttur í fyrirtækjamenningunni

Konfektmolarnir urðu viðráðanlegir

Stundum þarf ekki flókinn búnað til að ryðja hindrunum úr vegi. Halla nefnir starfsmann sem átti erfitt með að greina á milli súkkulaðimola við konfektpökkun. Lausnin var að prenta út blað sem studdi við verkefnið.

„Áður en við vissum af þá var hún farin að pakka þessum konfektmolum sjálf og ein óstudd,“ segir Halla.

Dæmið sýnir hvernig einföld aðlögun getur aukið sjálfstæði í starfi. Halla segir lausnirnar að miklu leyti eiga rætur í þroskaþjálfun, þar sem myndrænt skipulag og einstaklingsmiðuð nálgun nýtast við að finna leiðir sem henta hverjum og einum.

Þar er útgangspunkturinn að skoða verkefnið og þarfir starfsmannsins saman. Í þessu tilviki fólst stuðningurinn í einföldu hjálpargagni sem gerði gæfumuninn við pökkunina og hjálpaði starfsmanninum að ná tökum á verkinu á eigin forsendum.

Fræðsla og opið samtal

Verkefnið mætti þó efasemdum innan fyrirtækisins. Harpa segir þær gjarnan spretta af því að fólk þekki ekki viðfangsefnið. Áhersla hafi því verið lögð á fræðslu og að fá stjórnendur með í lið. Koma Höllu og sérþekking hennar hafi skipt miklu máli í þeirri vinnu.

„Þetta snýst um það að vera opin, tala saman og vera ófeimin við að ræða það sem mætti betur fara og spyrja spurninga,“ segir Harpa.

Þær segja inngildingu vera viðvarandi verkefni sem kalli á stöðuga athygli. Þarfir fólks og aðstæður breytast og því þarf sífellt að skoða hvernig megi gera hlutina betur. Samvinna og opinn hugur eru þar lykilatriði.

Fyrirtæki sem vilja feta sambærilega leið geta byrjað á að skoða aðgengi og mögulegar úrbætur á eigin vinnustað og leita til Vinnumálastofnunar. Reynsla Nóa Síríus af samstarfinu hefur verið góð og vilji til að finna lausnir einkennt samskiptin.

Hjá Nóa Síríus hefur þessi nálgun skapað störf þar sem aðlögunin tekur mið af einstaklingnum. Konfektpökkunin er eitt dæmi um það hvernig lítil breyting getur gert starfsmanni kleift að sinna verkefni sjálfstætt.

Þessi grein er hluti af samstarfi Sýnar og Creditinfo um Framúrskarandi fyrirtæki.

Framúrskarandi fyrirtæki 2026