Innlent
Vill fund vegna landsliðanna
Samþykkt var í mannréttindanefnd Reykjavíkurborgar í gær að Eggert Magnússon, formaður Knattspyrnusambands Íslands, yrði boðaður til fundar við nefndina til að ræða þann mikla mun sem er á stöðu kvenna og karla í landsliðum Íslendinga í knattspyrnu. Það var Bryndís Ísfold Hlöðversdóttir, fulltrúi Samfylkingarinnar í mannréttindanefnd, sem flutti tillöguna.
Stal þurrkgrind og sængurverum
Rétt tæplega fimmtug kona var dæmd í sextíu daga fangelsi í Héraðsdómi Reykjavíkur á þriðjudag fyrir gripdeild. Konan hafði í júní á þessu ári farið inn í verslun Rúmfatalagersins og tekið ófrjálsri hendi barnakerru, tvo barnaramma, tvö sængurverasett, þurrkgrind og svefnpoka. Hún gekkst greiðlega við broti sínu.
Olli nágrönnum óþægindum
Slökkvilið Akureyrar var kallað út á þriðjudagskvöld vegna elds í stórum heystafla við sveitabæ í Eyjafjarðarsveit. Kveikt hafði verið í heyrúllum fyrr um daginn en mikill reykur sem barst frá eldinum var farinn að valda íbúum í nágrenninu töluverðum óþægindum. Tveir dælubílar slökkviliðsins komu á staðinn auk þess sem hjálparlið sveitarinnar var ræst út. Nokkra klukkutíma tók að ráða niðurlögum eldsins enda þurfti að tæta rúllurnar í sundur til að slökkva allar glæður. Því gekk slökkvistarf frekar seinlega.
Lýsa yfir vonbrigðum sínum
Alp Mehmet, sendiherra Breta á Íslandi, afhenti í gær mótmæli 25 þjóða og framkvæmdastjórnar Evrópusambandsins við hvalveiðum Íslendinga í atvinnuskyni. Í mótmælaskjali sem sendiherrann afhenti Grétari Má Sigurðssyni, ráðuneytisstjóra utanríkisráðuneytisins, kemur fram að þjóðirnar vilji ítreka mótmæli sín og vonbrigði vegna atvinnuhvalveiða Íslendinga og eru stjórnvöld hvött til að endurskoða ákvörðun sína.
Hverfisbúðin Rangá 75 ára
Í gær voru 75 ár liðin síðan hverfisbúðin Rangá var stofnuð af Jóni Jónssyni frá Ekru í Rangárvallahreppi en verslunin hefur einungis verið í eigu tveggja aðila frá upphafi. Hún er ein af elstu matvöruverslununum í Reykjavík sem rekin hefur verið undir sama nafni alla tíð.
Býður sig fram í annað sætið
Una María Óskarsdóttir býður sig fram í 2. sæti framboðslista Framsóknarflokksins í Suðvesturkjördæmi. Kjör um sex efstu sætin fer fram á kjördæmisþingi 4. nóvember næstkomandi.
Blaðberar rændir
Tveir blaðberar voru rændir í Reykjavík snemma á mánudagsmorgun. Annað ránið átti sér stað í Fossvoginum og hitt á Austurbrún. Ræningjarnir hótuðu blaðberunum ofbeldi ef þeir létu þá ekki fá verðmæti sín.
Áfrýjað til Hæstaréttar
Eiður Eiríkur Baldvinsson, forsvarsmaður starfsmannaleigunnar 2b, segir að dómi Héraðsdóms Austurlands verði áfrýjað til Hæstaréttar en dómurinn dæmdi á þriðjudag 2b til að greiða tólf Pólverjum vangreidd laun og flugfarseðla, að meðaltali um 300 þúsund krónur á mann, auk málskostnaðar og dráttarvaxta.
Lögreglumenn verða ekki vopnaðir
Dómsmálaráðherra telur ekki ástæðu til að auka vopnaburð lögreglumanna þrátt fyrir aukna vopnanotkun í undirheimunum.
Trúa að nýtt frumvarp skili þyngri refsingum
Formaður allsherjarnefndar Alþingis telur að nýtt frumvarp um kynferðisbrot muni skila þyngri refsingum í nauðgunarmálum.
Sex manns í gæsluvarðhaldi vegna fjögurra fíkniefnamála
Sex manns sitja í gæsluvarðhaldi og hald hefur lagt á umtalsvert magn fíkniefna í fjórum stórum fíkniefnamálum sem komið hafa til kasta lögreglunnar á stuttum tíma.
Reynt að draga úr hraða í höfninni
Það er ekki aðeins á vegum landsins sem reynt er að draga úr hraða. Fréttavefurinn Víkurfréttir greinir frá því að í höfninni í Grindavík hafi verið komi upp skilti sem sýni að hámarkshraði innan hafnarinnar sé fjórar sjómílur. Ástæðan er sögð sú að sjófarendur hafi oft á tíðum verið að flýta sér of mikið í höfninni.
Hugað verði að ímynd Norðurlanda á alþjóðavettvangi
Jónína Bjartmarz, umhverfisráðherra og samstarfsráðherra Norðurlanda, leggur áherslu á að hugað sé að ímynd Norðurlanda á alþjóðavettvangi og telur að norrænt samstarf sé líklega mikilvægara nú á dögum alþjóðavæðingar en nokkru sinni fyrr. Þetta kom fram í ræðu Jónínu á Norðurlandaráðsþingi í dag sem greint er frá í fréttum frá þinginu.
LSH setji Stefán aftur í sitt fyrra starf
Læknafélag Reykjavíkur hefur sent frá sér ályktun þar sem það beinir þeim tilmælum eindregið til yfirstjórnenda Landspítalans að setja Stefán E. Matthíasson aftur í sitt fyrra starf sem yfirlæknir.
Hagnaður Exista yfir væntingum
Fjármálaþjónustufyrirtækið Exista skilaði 27,6 milljörðum króna í hagnað á þriðja fjórðungi ársins. Hagnaðurinn á fyrstu níu mánuðum ársins nam 24,3 milljörðum króna. Þetta er talsvert meira en greiningardeildir þriggja stærstu viðskiptabankanna gerðu ráð fyrir.
Tvö prófkjör hjá Samfylkingunni um helgina
Efnt verður til tveggja prófkjöra hjá Samfylkingunni um helgina og úrslitin í því þriðja verða einnig gerð ljós um helgina. Á laugardaginn kemur fara fram prófkjör flokksins í Suðvesturkjördæmi og Suðurkjördæmi.
Samstaða um að almennir lögreglumenn verði áfram óvopnaðir
Samstaða var um það í utandagskrárumræðu á Alþingi í dag að almennir lögreglumenn hér á landi skyldu áfram vera óvopnaðir. Það var Þórunn Sveinbjarnardóttir, þingmaður Samfylkingarinnar, sem var málshefjandi og vakti athygli á því að starfshópur á vegum Ríkislögreglustjóra hefði lagt til í skýrslu aukna vopnvæðingu hjá lögreglunni.
FME segir regluvörslu í góðu horfi
Fjármálaeftirlitið hefur á þessu ári gert reglubundnar úttektir á framkvæmd reglna um meðferð innherjaupplýsinga og viðskipta innherja hjá tveimur félögum sem skráð eru í Kauphöllina, Marel hf. og Atlantic Petroleum. Niðurstaða FME er sú að regluvarsla hjá fyrirtækjunum sé almennt í góðu horfi.
Steingrímur J. styður sjálfstæði Færeyja
Steingrímur J. Sigfússon, formaður Vinstri grænna lýsti yfir stuðningi við sjálfstæðisbaráttu Færeyinga, á þingi Norðurlandaráðs, í Kaupmannahöfn, í dag. Hann studdi einnig að sjálfstjórnarsvæðin fengju fulla aðild að Norðurlandaráði.
Sprengingar að hefjast Ólafsfjarðarmegin vegna ganga
Sprengingar hefjast á morgun Ólafsfjarðarmegin vegna Héðinsfjarðarganga. Fram kemur á norðlenska fréttavefnum Dagur.net að til að byrja með verði aðeins um nokkrar litlar sprengingar að ræða því fara þurfi varlega í bergið við gangnamunnann.
Sýknaður af ákæru um utanvegaakstur
Héraðsdómur Suðurlands sýknaði í dag karlmann af ákæru um utanvegaakstur. Maðurinn var gripinn á torfæruhjóli þegar Landhelgisgæslan og lögreglan á Selfossi voru í eftirlitsflugi með utanvegaakstri í umdæmi Selfosslögreglunnar í júní síðastliðnum, en þá ók hann ásamt tveimur öðrum eftir slóða í vestanverðum Hengli.
Norðurlöndin reiðubúin að aðstoða Ísland í öryggismálum
Ástand öryggismála á Íslandi var eitt þeirra mála sem norrænu utanríkisráðherrarnir ræddu á fundi sínum í Kaupmannahöfn á miðvikudag. Brotthvarf Bandaríkjahers frá Keflavík hefur ekki einungis áhrif á Ísland heldur Norðurlöndin öll.
Harma skert fjáframlög til Alþjóðahússins
Ungir jafnaðarmenn í Reykjavík harma þá ákvörðun borgarstjórnar Reykjavíkur að skerða fjárframlög til Alþjóðahússins um þriðjung. Fjölgun innflytjenda hafi aldrei hafa verið meiri hér á landi en nú. Álag á Alþjóðahúsið og starfsmenn þess sé því gífurlegt.
Um fjörtíu eftirskjálftar við Flatey
Um fjörtíu eftirskjálftar hafa mælst við Flatey á Skjálfanda eftir að snarpur skjálfti upp á 4,5 á Richter mældist þar fimm mínútur í tvö í dag. Fyrstu mælingar bentu til þess að skjálftinn hefði verið 5 á Richter en mælingar Veðurstofunnar sýna að hann var 4,5.
Sextán vilja sæti á lista Sjálfstæðisflokksins í NV-kjördæmi
Sextán gefa kost á sér á lista Sjálfstæðisflokksins í Norðvesturkjördæmi en þar verður stillt upp á lista. Þar á meðal eru allir núverandi þingmenn flokksins í kjördæminu, þeir Stula Böðvarsson samgönguráðherra, Einar K. Guðfinnsson sjávarútvegsráðherra og Einar Oddur Kristjánsson.
Óttast glæpaöldu frá Búlgaríu og Rúmeníu
Breska ríkisstjórnin hefur varað við mikilli glæpaöldu þegar Búlgaría og Rúmenía fá aðgang að Evrópusambandinu fyrsta janúar næstkomandi. Lögregluyfirvöld eru í sambandi við ríkisstjórnir landanna tveggja til þess að byggja upp forvarnir. Björn Bjarnason, dómsmálaráðherra, segir að grannt sé fylgst með málinu hér á landi.
Brúin yfir Skeiðará opnuð aftur
Búið er að opna aftur brúna yfir Skeiðará fyrir umferð en henni var lokað fyrr í dag vegna umferðarslyss. Þar rákust tveir bílar saman en lögregla á Kirkjubæjarklaustri sagði slysið ekki alvarlegt.
Nokkrir eftirskjálftar
Að minnsta kosti átta litlir eftirskjálftar hafa mælst út af Flatey á Skjálfanda frá því skjálfti upp á fimm á Richter mældist þar rétt fyrir klukkan tvö. Skjálftarnir hafa verið á bilinu 0,6 til 1,7 á Richter. Skjálftans varð víða vart í kring og fannst vel á Akureyri.
Lögregla leitar ræningja
Lögreglan í Reykjavík leitar nú 5-6 manna í tengslum við tvö rán í borginni í gærmorgun. Þá var veist að tveimur blaðberum, öðrum í Hjallalandi en hinum á Brúnavegi við Kleifarveg. Í báðum tilvikum var komið aftan að blaðberunum og þeir krafðir um peninga en hvorugur þeirra var með fjármuni á sér. Hins vegar var farsímum þeirra stolið.
Fá bæði ummönnunar- og fæðingarorlofs-greiðslur
Magnús Stefánsson félagsmálaráðherra sagði á þingi í dag að hann hygðist beita sér fyrir lagabreytingu sem tryggði það að foreldrar fatlaðra barna gætu fengið umönnunargreiðslur samtímis greiðslum í fæðingarorlofi. Þetta tilkynnti hann í svari sínu við fyrirspurn Jóhönnu Sigurðardóttir, þingmanns Samfylkingarinnar, um málið.
