Hindra löndun úr Sólbaki

Forystumenn sjómanna hafa komið í veg fyrir í allan dag að hægt sé að landa úr Sólbaki EA sem gerður er út af Brimi. Skipið kom til hafnar laust eftir hádegi en forystumenn sjómanna, þ.á m. Sævar Gunnarsson, formaður Sjómannasambands Íslands, Árni Bjarnason, forseti Farmanna- og fiskimannasambands Íslands og Jónas Garðarsson, formaður Sjómannafélags Reykjavíkur, fóru niður að bryggju þegar skipið lagðist að og hafa þeir hindrað löndun úr skipinu. Brim gerði á dögunum kjarasamning við áhöfn Sólbaks. Sjómannaforystan fordæmir þennan samning og segir hann ólöglegan. Guðmundur Kristjánsson, forstjóri Brims, hefur farið fram á það við lögreglu að hún fjarlægi mennina af bryggjunni svo löndun geti hafist, en lögregla segir í samtali við fréttastofu að hún ætli sér að bíða átekta þar sem hún líti svo á að þetta sé vinnudeila.