Húsasúpan hönnuð á staðnum

Hjónin að Brekkugerðishúsum í Fljótsdal bera gestum sínum oft góða súpu með heimabökuðu brauði.

Þau Hákon Aðalsteinsson og Sigrún Benediktsdóttir að Húsum í Fljótsdal eru matgæðingar miklir og gestir þeirra njóta þess. Meðal þess sem þau bera stundum á borð er súpa sem hefur fengið heitið Húsasúpa því hún er hönnuð á staðnum. Þótt Sigrún segi Hákon vera snilling í matreiðslu lambakjöts er hún sjálf ábyrg fyrir súpunni góðu. "Ég var orðin svo þreytt á hinni hefðbundnu íslensku kjötsúpu svo ég tók mig til og breytti henni dálítið," segir hún og kveðst gefin fyrir að fara eigin leiðir í matreiðslu. Sigrún gaf okkur góðfúslega grunnuppskriftina að súpunni en segir hvern og einn verða að smakka hana til eftir sínu höfði.

Húsasúpa

olía

svartur pipar

smá salt

6-8 lærissneiðar eða annað gott lambakjöt

4 laukar

4 tsk. karrí

1/2 höfuð hvítkál

6 gulrætur meðalstórar

1/1 dós ananas

1 pk. þurrkaðar apríkósur

4-5 grænmetisteningar

1/2 tsk. fennel

Olían er sett á pönnu og svartur pipar mulinn í, ásamt salti. Kjötsneiðarnar eru skornar í tvennt, léttsteiktar í olíunni og settar í pott. Karríið er hitað í olíu áður en grænmetið er sett á pönnuna og léttsteikt. Allt sett í pott með vatni og soðið í um það bil 1 og 1/2 tíma. Súpan er gulleit á lit og súrsæta bragðið vegur vel á móti kryddinu. Hún er borðuð með heimabökuðu grófu brauði.