Það er sálin sem býr húsið til

"Ég á dálítið erfitt með að velja uppáhaldshúsið mitt en held ég verði að nefna hús Bókabúðar Máls og menningar á Laugaveginum," svarar Ásthildur spurð um sitt uppáhaldshús. "Það skemmtilegasta sem ég geri er að fara í þessa búð og skoða bækur, það er eins og ég komi inn í annan heim þegar ég geng inn í húsið og það er alveg frábært. Ég hef komið í margar aðrar bókabúðir en þessi kveikir virkilega í mér. Kannski hefur það eitthvað með húsið að gera," segir Ásthildur og viðurkennir að húsið sjálft sé í raun ekki mjög spennandi, það sé lífið í húsinu sem geri það svo spennandi. "Þetta hús er alls ekki fallegt að utan en það er einhver sál inni í húsinu. Kannski er það vegna þess að sama búðin hefur verið þarna svo lengi. Meðan aðrar búðir leggja upp laupana stendur þessi eins og klettur og þess vegna er þetta hús í mínum huga eins konar akkeri á Laugaveginum." Ásthildur segir að í raun og veru muni hún varla hvernig húsið sjálft líti út. "Þetta er náttúrlega bara kassi og í sjálfu sér ekkert spennandi við arkitektúrinn eða útlit hússins. Það er líka athyglisvert að þegar maður labbar niður Laugaveginn, sér maður eiginlega ekki húsin heldur horfir maður bara á búðirnar. Maður ætti einstaka sinnum að horfa upp og skoða húsin því þau eru virkilega skemmtileg. Auðvitað eru nokkur ljót hús inn á milli en heildarmyndin er góð og stemmningin einstök." Ásthildur frumsýndi á dögunum heimildamynd sína "Rósku" á stuttmynda- og heimildamyndahátíðinni "Reykjavík Shorts & Docs". Myndin fjallar um listakonuna Rósku, örlög hennar og listalíf og segist Ásthildur reyna að draga upp nýja mynd af listakonunni þar sem líf hennar á Ítalíu spilar stóra rullu."Róska var margbrotinn listamaður sem kannski hefur ekki fengið verðskuldaða athygli. Hún var líka pólitískur aðgerðasinni sem við Íslendingar getum lært mikið af," segir Ásthildur.