Glæsimark Henry slökkti í Írum

Snillingurinn Thierry Henry sýndi enn á ný hvers hann er megnugur þegar hann skoraði sigurmark Frakka á Írum í landsleik þjóðanna í gærkvöldi. Írska liðið lék mjög vel í gær með Roy Keane í fantaformi á miðjunni, en þegar maður eins og Henry er annars vegar, má lítið útaf bera í varnarleiknum. Henry sneri boltann stórglæsilega fram hjá Shay Given í marki Íra af um 25 metra færi og kom markið nánast upp úr engu. Írarnir þurfa að vinna tvo síðustu leiki sína til að eiga möguleika á að komast áfram og það telur Brian Kerr þjálfari liðsins vera mögulegt. "Ég var mjög ánægður með framgöngu liðsins í kvöld og það eina sem vantaði var að ná að skora. Markið hjá Henry var stórkostlegt og svona gerist þegar maður spilar á móti bestu leikmönnum veraldar. Ég er bjartsýnn á að við vinnum næstu tvo leiki, jafnvel þó við verðum án Roy Keane í þeim næsta," sagði Kerr.