Vodafone þéttir hjá sér GSM netið

Vodafone hefur eflt GSM sambandið fyrir viðskiptavini sína á höfuðborgarsvæðinu og á Selfossi.

Í tilkynningu Vodafone kemur fram að fyrirtækið hafi bætt við GSM sendum í Súðavogi í Reykjavík, við Geitháls fyrir utan borgina og við Fossveg á Selfossi og það tryggi viðskiptavinum betra samband á þessum svæðum. Mikil áhersla hefur verið lögð á fjölgun GSM senda á höfuðborgarsvæðinu, Suðurlandi og Norðurlandi á þessu ári. Þá hefur Vodafone tekið í notkun búnað sem tryggir sjálfvirkt eftirlit með GSM kerfi fyrirtækisins. Með slíkum búnaði getur fyrirtækið komið í veg fyrir mögulegar bilanir og aukið gæði GSM-kerfisins, segir í tilkynningu Vodafone á Íslandi.