Engan leka takk fyrir

Viðskiptatímaritið Economist er frægt fyrir að leggja mikið upp úr því að hafa skemmtilegar fyrirsagnir á greinum sínum. Blaðinu er dreift um heim allan og hefur því efni á að leyfa sér að halda úti sérstöku teymi fyrirsagnasmiða sem sagan segir að geri lítið annað en að upphugsa eitthvað skemmtilegt.

Þannig er í nýjasta tölublaði Economist að finna fyrirsögnina „Ram-a-lamb-a-ding-dong“ með grein um hrútasæði, tæknilegar hindranir og iðnaðinn í kringum þann geira landbúnaðarins.

Í sömu grein leyfir blaðið sér reyndar ákveðna tvíræðni líka í niðurlagi umfjöllunar um nýja tækni við að geyma sæði því þar segir að leynd hvíli yfir smáatriðum tækninnar „þar sem fjárfestar vilji síður horfa upp á mikinn leka“.