Kompás á sunnudag - kveður í bili

Fegrunaraðgerðir á Íslandi og Lögreglukórinn í Rússlandi - KOMPÁS á NFS og  Stöð 2 NK. sunnudag, kl. 19:10

Tvö ólík mál verða tekin fyrir í Kompási á sunnudaginn:

Fegrunaraðgerðir  á Íslandi  og Lögreglukórinn í Rússlandi.

Fegrunaraðgerðir á Íslandi. Hvernig er eftirliti með slíkum aðgerðum háttað. Er eitthvað eftirlit? Er vitað hvað fegrunaraðgerðir kosta hér á landi? Hvað kostar að fylla í varir? Stækka brjóst eða sjúga fitu úr rassi? Kompás skoðar málið.

Lögreglukór Reykjavíkur var á dögunum á söngferðalagi í Rússlandi og Eistlandi. Kompás slóst með í för. Föngulegum íslensku lögreglumönnunum var tekið vel í Rússlandi og fengu mikla athygli. Um milljón manns sáu kórinn í beinni sjónvarpsútsendingu í Pétursborg þar sem kórinn söng nokkur lög. Rússar hafa fremur lítið álit á gerspilltum lögreglumönnum þar í landi og það þótti merkilegt að sjá íslenska starfsbræður þeirra koma fram í hátíðarbúningum - syngjandi glaða. Þetta verður síðasti Kompás-þátturinn að sinni. Kompás mun snúa aftur með haustinu; öflugri en nokkru sinni áður.

Bent skal, í þessu samhengi, á nýjan fréttasíma Kompáss, sem fólk getur hringt í með nafnlausar ábendingar, er: 691-0060. Netfang þáttarins er: kompas@365.is

Kompás hefur klárlega slegið í gegn. Það staðfestir dagbókarkönnum Gallup sem birt var á dögunum. Þar er Kompás með 17,5 % prósent áhorf meðal allra sjónvarpsáhorfenda á aldrinum 12-80 ára en áhorfið fer uppí hvorki meira né minna en 24 % í hópi áskrifenda á aldrinum 12-49 ára. Þetta er glæsilegur árangur hjá svo nýjum fréttaskýringaþætti. Þessar tölur staðfesta svo um munar að þátturinn hefur vakið mikla athygli, ekki einasta fyrir hugað og glöggt efnisval, heldur ekki síður fyrir fersk og vönduð efnistök.

Hér er um alvöru fréttaskýringaþátt að ræða þar sem hispurslaus og vönduð rannsóknarblaðamennska er höfð í hávegum. Í hverjum þætti eru krufin til mergjar heit fréttamál; jöfnun höndum dregin fram ný og áður ókunn sjónarmið á málum sem þegar hafa komist í fréttir og nýjar uppgövanir dregnar fram í kastljósið. Eins og nafnið gefur til kynna fer Kompás í allar áttir, er ekkert óviðkomandi og verður leitast við að hafa fjölbreytnina í fyrirrúmi í hverjum þætti. Þannig má segja að hann eigi sér að vissu leyti erlendar fyrirmyndir í virtum fréttaskýringaþáttum á borð við 60 minutes og 48 Hours.