Garðar Thór og Katherine Jenkins á ferð um Bretland

Garðar Thór Cortes og Katherine Jenkins áttu stórleik í Laugardalshöll þann 29. apríl sl. Tónleikarnir fengu frábæra dóma og nú eru Garðar og Katherine að leggja upp í tónleikaferð um Bretland.

Fyrstu tónleikarnir verða í London mánudaginn 23. október nk. og þeir

eru haldnir í Croydon Fairfield og hefjast þeir kl. 20.00.

Icelandair býður tónlistaráhugafólki uppá sérstaka ferð til London á þessa frábæru tónleika. Flugmiði til London ásamt miða á tónleikana eru fáanlegir á www.icelandair.is og kosta samtals kr. 34.600,-

Eins og komið hefur fram í fjölmiðlum er Katherine Jenkins söluhæsta klassíska söngkona Bretlands bæði fyrr og síðar. Katherine er ung að aldri en á að baki stórbrotinn feril á sviði klassískrar tónlistar.

Hún og hennar fólk hafa nú boðið Garðari Thór að vera sérstakur gestur hennar á stórri og mikilli tónleikaferð um Bretland núna í haust. Nú snúast leikar nokkurn veginn við. Hér heima söng Katherine fimm lög og tvo dúetta með Garðari en hann söng tíu lög til viðbótar við dúettana tvo. Í Bretlandi mun Garðar taka fimm lög inní hennar dagskrá og syngja tvo dúetta með henni.

Garðar Thór verður kynntur sem sérstakur gestur Katherine Jenkins í öllu kynningar- og auglýsingaefni sem sent verður út og birt í kringum tónleikana. Það verður mikil lyftistöng fyrir alla kynningu á Garðari Thór í Bretlandi því bara auglýsingarnar í kringum tónleikana hlaupa á fleiri tugum milljóna. Markmiðið með því að slást í þessa tónleikaferð er að ná að kynna Garðar Thór og sönglist hans fyrir Bretum og síðan er stefnt á útgáfu plötu með honum í byrjun árs 2007.

Miðar á tónleikaferðina fóru í sölu í síðustu viku og nú þegar er

uppselt á alla tónleika hennar í Wales en það er hennar heimaland.

Miðar á aðra tónleikastaði fara hratt. Fyrir þá sem heilluðust af þeim í Laugardalshöll eða misstu af þeim en vilja nú tryggja sér miða þá er bent á netsíðuna www.aloud.com en þar er hægt að tryggja sér miða á tónleikaferðina.

Hér má sjá hlekki þar sem skoða má upplýsingar um ferð þeirra.

http://www.gardarthorcortes.com/

http://www.fairfield.co.uk/

http://www.cortes.is/

http://www.katherinejenkins.co.uk/