Plata Dr. Gunna frá 1997, Abbababb!, er líklegast best heppnaða barnaplata frá því að Eniga Meniga kom út. Hafnarfjarðarleikhúsið sýnir nú leikrit byggt á þessu snilldarverki Dr. Gunna og nú er komin út plata með lögum leikverksins sem inniheldur heil sextán lög.
Fjörið á völdin á plötunni og tónninn er strax gefinn í fyrsta laginu, stuðlaginu Abbababb! þar sem áhrifin frá Devo leyna sér ekki. Á eftir blasa síðan við lög sem einnig voru á upprunalegu plötunni en nokkur ný fá einnig að fljóta með. Skemmtilegust þeirra eru án efa „60‘s garage“ lagið Hr. Rokk og Fýlustrákarnir og hið eiturhressa Hr. Diskó sem er hálfgerð ábreiða af Daddy Cool með Boney M (sem Dr. Gunni tilnefndi á bloggsíðu sinni um daginn sem eitt af bestu lögum sögunnar). Af upprunalegu plötunni sakna ég þó helst Upp í sveit og Ó, kisa mín.
Aðalsmerki plötunnar eru glettnir textar, eins og Dr. Gunna er einum lagið. Einfalt rím og barnslega einfalda textar, oft yndislega súra, er auðvelt að gleypa og ekki þarf margar spilanir þangað til maður byrjar sjálfur að raula með.
Það sem skilur þessa plötu helst frá forvera sínum eru flytjendurnir sem voru töluvert betri á fyrri plötunni. Sigurjón Kjartansson setur þó skemmtilegan svip á plötuna, Álfrún Örnólfsdóttir skilar sínu vel og Atli Þór Albertsson kemur á óvart. Aðrir bæta litlu við lögin og ná ekki alveg að gefa þeim þann persónuleika sem þarfnast. Hljómur plötunnar er líka örlítið flatur, kannski er hljóðjöfnunni um að kenna, en nokkur lög ná þó skemmtilegri vídd. Platan á samt vafalaust eftir að kæta krakka á öllum aldri og getur komið öllum í gott stuð.
Steinþór Helgi Arnsteinsson
