Hvítflibbarnir fara

Stjórnendur Eimskipafélagsins stefna að því að selja eignir út úr kæligeymslufyrirtækinu Atlas Cold Storage sem gæti skilað þeim öllu kaupverðinu til baka. Þá er unnið að bæta rekstur Atlas með lækkun rekstrarkostnaðar og hækkun tekna.

Starfsmönnum félagins hefur fækkað um 200 manns eftir að Eimskipafélagið tók það yfir en „hvítflibbar" og gamlir lykilstjórnendur eru í hópi þeirra sem hafa fengið að taka pokann sinn. Þessar aðgerðir koma spánskt fyrir sjónir þegar orð Reynis Gíslasonar, forstjóra Atlas, frá því er yfirtökunni lauk eru höfð í huga. Hann sagði þá: „Atlas er framúrskandi fyrirtæki með sterkt stjórnendateymi sem hefur skilað góðum árangri að undanförnu og á þessum styrku stoðum ætlum við að byggja enn frekar ... "

Það færist í aukana að íslensk stórfyrirtæki veiti fé til afmarkaðra verkefna í Háskóla Íslands. Bakkavör Group og Háskóli Íslands hafa gert með sér samning um að félagið mun styrkja viðskipta- og hagfræðideild Háskóla Íslands um fimm milljónir á ári, árin 2007, 2008 og 2009.

Á móti skuldbindur viðskipta- og hagfræðideild til að hafa ævilega í boði kennslu í frumkvöðla- og nýsköpunarfræðum sem tekur mið af nýjustu þekkingu í þeim fræðum. Einnig mun hún stunda reglubundnar rannsóknir á sviði frumkvöðla- og nýsköpunarfræða. Kristín Ingólfsdóttir rektor, Ingjaldur Hannibalsson prófessor og Ágúst Guðmundsson, forstjóri Bakkavarar, undirrituðu samninginn við hátíðlega athöfn í gær í Háskóla Íslands í gær.