Varhugaverð Búlgaríublöð

Þeir eru orðnir fáir hér á landi sem þora að lesa búlgörsku dagblöðin án þess að setja upp fyrirvaralesgleraugun. Ástæðan eru þær misvísandi og oft á tíðum beinlínis röngu fregnir sem blöðin fluttu af sölu Novators, fjárfestingafélags Björgólfs Thors Björgólfssonar, á 65 prósenta hlut í búlgarska símafyrirtækinu (BTC), sem gekk í gegn í síðustu viku.

Í fyrsta lagi römbuðu blöðin ekki fyrr en rétt undir lok undirskriftar á kaupsamningi hver hugsanlegur kaupandi var auk þess sem fjárhæðirnar ruku til og frá eins og lauf í vindi. Fréttaflutningur sem þessi er náttúrlega óhæfa enda setur það mikla pressu á upplýsingafulltrúa fyrirtækja, sem þurfa að hringja trekk í trekk í fjölmiðla víða um heim og leiðrétta, oft að því er virðist skáldaðar fréttir, sem farið hafa óhindrað fram.