Sumartónleikar í Skálholti

Dagskrá þriðja hluta Sumartónleika í Skálholti hefst í dag og stendur fram á sunnudag. Í henni kennir ýmissa grasa og ber þar hæst samstarfsverkefnið Ísland-Austurríki en um er að ræða verkefni sem Sumartónleikar hafa unnið í samvinnu við tvö austurrísk tónskáldafélög.

Auk þess er í dagskránni að finna fyrirlestra, þrenna kammertónleika, tónleika Hljómeykis með verkum Jóns Nordal og loks tónleika Jaap Schröders og Sigurðar Halldórssonar, þar sem flutt verða verk frá lok 17. aldar eftir Bach og ítölsk tónskáld.

Sú skemmtilega nýjung er í boði á Sumartónleikum að leiklistarsmiðja verður fyrir börnin á laugardag kl. 14.55. Leiðbeinandi verður Ingólfur Björn Sigurðsson en hann hefur víðtæka reynslu í leiklistarkennslu barna og ungmenna. Öll börn frá sex ára aldri geta tekið þátt og í lok dagsins verður flutt sýnishorn af afrakstri dagsins fyrir foreldra og aðra tónleikagesti.

Ókeypis aðgangur er að öllum tónleikum og fyrirlestrum Sumartónleika enda er það hugsjón aðstandenda að kirkjan standi öllum opin. Heildarefnisskrá, með ítarlegri dagskrá og efnisskrártextum, er nú fáanleg í versluninni 12 Tónum. Allar nánari upplýsingar um efnisskrá, dagskrá og flytjendur er að finna á heimasíðu hátíðarinnar, www.sumartonleikar.is.