Sölumet slegin

VW slær sölumet sjöunda mánuðinn í röð.

Sala hefur aukist mikið á fyrstu sjö mánuðum ársins hjá Volkswagen-samstæðunni. Sett var sölumet í júlí þegar seldust 522 þúsund bílar, sem er 10,2% söluaukning miðað við sama mánuð í fyrra.

Þetta var jafnframt sjöundi mánuðurinn í röð sem sölumet var slegið. Fyrstu sjö mánuðina seldi Volkswagen-samstæðan 3,61 milljón bíla úti um allan heim sem er 8,1 prósenti meiri sala en fyrir sama tímabil í fyrra.

Von er á nýjum gerðum frá framleiðandanum sem kynntar verða á bílasýningunni í Frankfurt í næsta mánuði. Þar á meðal er nýi Volkswagen-jeppinn Tiguan en talað hefur verið um þann bíl sem litla bróðir Touareg-jeppans.

Í Evrópu jókst salan fyrstu sjö mánuðina um 3,7%, fór í 2,17 milljónir bíla. 22,5% aukning varð í sölu fyrstu sjö mánuðina í Asíu og Kyrrahafslöndunum og nam salan 591 þúsund bílum. Þá jókst salan um 28,7% í Suður-Ameríku og um 2,1% í Norður-Ameríku. Volkswagen var söluhæsta gerð samstæðunnar með 2,11 milljón bíla sölu fyrstu sjö mánuðina, sem er 7,9% aukning milli ára.

Söluaukning Audi var 9,7% á sama tímabili en enn meiri varð hún hjá Skoda, 13,3%. Mestu söluaukningu í sögu samstæð­unnar skilaði þó Bentley með 23% aukningu á tímabilinu en að baki því hlutfalli stendur sala á 6.500 bílum, og Lamborghini með 24% aukningu með sölu á 1.400 bílum.