Halldór slasaðist á æfingu

Fresta þarf frumsýningu leiksýningarinnar Grettis sem frumsýna átti í Borgarleikhúsinu á föstudag um þrjár vikur. Ástæðan er sú að Halldór Gylfason leikari, sem leikur sjálfan Gretti, meiddist í baki á æfingu á laugardaginn. Hann sagði í samtali við fréttastofu að hann væri „hundsvekktur."

Hann hefði einungis verið að hoppa um einn meter en lent þannig að hann fékk hnykk á bakið. Verkurinn hafi síðan versnað eftir því sem leið á æfinguna.

Halldór fékk sprautu á laugardag og vonaðist til að jafna sig á tveimur til þremur dögum, en nú væri ljóst að þetta tæki lengri tíma. Meiðslin komi á versta tíma þar sem of stuttur fyrirvari sé til að breyta leikritinu með tilliti til meiðslanna.

Frumsýning var áætluð næstkomand næstkomandi föstudag, en henni hefur verið frestað til 22. apríl.