Wii trónir á toppnum

Wii-leikjatölvan frá Nintendo er komin í efsta sæti í leikjatölvustríðinu. Síðan hún kom út í lok síðasta árs hefur hún selst ævintýralega vel og hafa framleiðendur vart undan að anna eftirspurninni. Fleiri eintök hafa selst af Wii en Xbox360, sem hefur verið á markaðnum tvöfalt lengur eða síðan í nóvember árið 2005.

Samkvæmt heimasíðu VG Charz, sem tekur saman sölutölur leikjatölva um allan heim, hefur Wii frá Nintendo selst best af þremur leikjatölvum þessarar kynslóðar, eða í 10.910.000 eintökum.

Xbox360 frá Microsoft fylgir fast á eftir með 10.670.000 seld eintök, en hún kom hins vegar mun fyrr út en Wii. Lestina rekur PlayStation 3 frá Sony, sem kom út á svipuðum tíma og Wii í Bandaríkjunum, með 4.390.000 eintök.

Wii hefur því tekið toppsætið í leikjatölvustríðinu með 42 prósent af seldum leikjatölvum þessarar kynslóðar, Xbox360 kemur næst með 41,1 prósent og PlayStation 3 er í þriðja og síðasta sæti með 16,9 prósent.

Töluverðar efasemdir voru um velgengni Wii áður en hún kom á markað, sér í lagi vegna þess hve óvenjuleg hún er miðað við hefðbundnari leikjatölvur. Í stað þess að leggja áherslu á öflugri tölvu með hraðari örgjörva og flottari leikjum einbeittu starfsmenn Nintendo sér að því að gera tölvuna aðgengilegri fyrir þá sem ekki hafa átt leikjatölvur hingað til.

Til að mynda líkist stýripinninn frekar sjónvarpsfjarstýringu en hefðbundnum stýripinna fyrir leikjatölvur, og er með innbyggðum hreyfiskynjara. Íþróttaleiki á borð við tennis og keilu er hægt að spila með því að hreyfa fjarstýringuna eins og spilarinn í leiknum, rétt eins og þú haldir á tennisspaða eða keilukúlu.

Miðað við velgengni tölvunnar síðan hún kom út virðist sem starfsmenn Nintendo hafi náð markmiði sínu, að fanga áhuga þeirra sem ekki hafa keypt leikjatölvur áður.