Horner segir að Alonso fari til Renault

Christian Horner, liðsstjóri Red Bull-liðsins, segir að Fernando Alonso muni snúa aftur á heimaslóðir og keppa fyrir Renault á næsta ári.

Alonso hætti hjá McLaren í síðasta mánuði eftir heldur stormasamt tímabil þar sem hann háði harða baráttu við liðsfélaga sinn, Lewis Hamilton.

Hann er nú að leita sér að nýju keppnisliði og hefur hann sagt að hann ætli sér að keppa í Formúlunni á næsta tímabili.

Red Bull er eitt þeirra liða sem hafa verið orðuð við Alonso en Horner telur að hann fari aftur til Renault, þar sem hann varð tvívegis heimsmeistari áður en hann skipti yfir í McLaren fyrir ári síðan.

„Okkur er heiður sýndur með því að vera orðaðir við Alonso. Það segir okkur að við höfum sýnt miklar framfarir undanfarin tvö ár. En báðir okkar ökumenn eru samningsbundnir liðinu til 2008,“ sagði Horner.

„Aðeins Renault og Toyota eru með laust sæti í sínu liði og tel ég að Fernando fari til Renault.“