Þjóðleikhúsið hafði sigur í nágrannaslag

„Ég hef ekkert um þetta að segja," segir Halldór Gylfason. „Það er bara „no comment"," bætir hann við og skellir á blaðamann augljóslega í fúlu skapi eftir að hafa tapað fyrir Þjóðleikhúsinu í árlegum knattspyrnuleik leikhúsanna á mánudaginn síðasta.

Liðsmenn Þjóðleikhússins voru hins vegar sigureifir enda ekki á hverjum degi sem þeir bera sigurorð af andstæðingum sínum. „Þetta var mikil barátta, enginn slasaðist og við unnum.

Maður getur bara ekki verið sáttari," segir Björn Hlynur Haraldsson sem stjórnaði miðju Þjóðleikhússins af mikilli festu. Björn segir þá hafa klúðrað töluverðum fjölda af dauðafærum og því hafi sigurinn verið sanngjarn þegar upp var staðið. Töluverð barátta einkenndi leik leikhúsanna og eitthvað var um leikaraskap. Menn gengu vasklega fram og þurfti Halldór meðal annars að fara út af um miðjan leik eftir að hann fór að kenna sér meins. Halldór sleit hásin í leik þessara fornu fjandmanna fyrir tveimur árum og var því að snúa aftur eftir þau meiðsl. Hann kenndi sér einhvers meins en ekki er vitað á þessu stigi málsins hvort það sé alvarlegt.

Annars fór leikurinn þannig að Þjóðleikhúsið náði að skora fimm mörk en Borgarleikhúsið fjögur. Maður leiksins var valinn Vignir Rafn Valþórsson en klúðrari starfsbróðir hans úr Þjóðleikhúsinu, Þórir Sæmundsson.- fgg